აბასთუმანში ხანძრის გამო სამსულიანი ოჯახი უსახლკაროდ დარჩა

„მთლიანად დაიწვა სახლი. პირველ სართულზე ცხოვრობდნენ, მეორე სართული მოუწყობელი იყო. ხანძრის დროს ოჯახის წევრები სახლში იმყოფებოდნენ“, – ამბობს მერის წარმომადგენელი სოფელ აბასთუმანში ვიქტორ მინაძე.

მისი თქმით, დაზარალებულ ოჯახს უკვე შეხვდნენ ადიგენის მერი და ინფრასტრუქტურის სამსახურის თანამშრომლები:“ყველა საქმის კურსშია, ხანძრის დროს დილამდე იქ ვიყავი. დღესაც მოვინახულეთ ოჯახი, მიმდინარეობს ზარალის დათვლა და შეძლებისდაგვარად დავეხმარებით. ჩვენ შევთავაზეთ ქირით გაყვანა, მაგრამ მისმა ბიძაშვილმა თქვა, რომ ის შეიფარებდა დროებით“.

ხანძარი ჩილაშვილების სახლში 17 მარტს, დაახლოებით, 01:00 საათზე გაჩნდა. რა გახდა შემთხვევის გამომწვევი მიზეზი უცნობია.



[თინათინ ზაზაძე, ადიგენი]