ბორჯომში ხანძარი ლოკალიზებულია – ადგილზე 6 სახანძრო ჯგუფი მუშაობს

შემთხვევის ადგილზე ამ დრომდე რჩებიან სასწრაფო სამედიცინო დახმარების და პოლიციის ეკიპაჟები.

ბორჯომის მერის მოადგილის, ბუბა ბერიძის განცხადებით, ცეცხლი საცხოვრებელ სახლზე კომერციული ფართიდან გადავიდა, სადაც ფურნეა განთავსებული.

"ხანძრის გაჩენის ორი ვერსიაა, როგორც ადგილობრივები ამბობენ, სავარადუდოდ ცეცხლი ხმელ ბალახს გაუჩნდა და შემდეგ ფურნეზე გადავიდა, მეორე ვერსიით კი ხანძარი საცხობში გაჩნდა, გამომწვევ მიზეზებს გამოძიება დაადგენს. სამწუხაროდ ფურნე არის თითქმის სრულად დამწვარი", – აცხადებს ბუბა ბერიძე.

მისი თქმით, ბორჯომის მერია დაზარალებულ მოსახლეობას დაეხმარება, ზარალის შესწავლა კი ხვალიდან დაიწყება.

სახანძრო სამაშველო სამსახურში აცხადებენ, რომ ამ ეტაპზე უცნობია რამდენი კვადრატია დამწვარი. მიმდინარეობს სალიკვიდაციო სამუშაოები.

შინაგან საქმეთა სამინისტროს განცხადებით, გამოძიება სსკ–ს 187–ე მუხლის მე–2 ნაწილით დაიწყო, რაც ნივთის დაზიანებას ან განადგურებას გულისხმობს. ისჯება თავისუფლების აღკვეთით ვადით სამიდან ხუთ წლამდე, იარაღთან დაკავშირებული უფლებების შეზღუდვით ან უამისოდ.









[ნუკა სტეფნაძე, ბორჯომი]