სამცხე-ჯავახეთის ოლქის პროკურორმა თანამდებობა დატოვა

პაპუაშვილი აცხადებს, რომ დაკავებული პოსტი ჯანმრთელობის პრობლემების გამო დატოვა.

„ამ ზაფხულს ინფარქტი გადავიტანე. ყოველთვის მინდოდა წამოვსულიყავი თბილისში, რადგან მანდ ვერ ვმკურნალობდი“, - განაცხადა მან.

კითხვაზე უკავშირდება თუ არა მისი თანამდებობის დატოვება მთავარ პროკურატურაში განხორციელებულ ცვლილებს გვპასუხობს: „ამ ამბებს უბრალოდ დაემთხვა ჩემი სურვილიც“.

პაპუაშვილი არ საუბრობს იმაზე, თუ სად გააგრძელებს სამომავლოდ საქმიანობას: „ამის შესახებ ყველა მალე შეიტყობთ“.

ოლქის ყოფილი პროკურორი არც იმას აკონკრეტებს, თუ როდის დაწერა განცხადება გათავისუფლების შესახებ: „განცხადება რამდენიმე დღის წინ დავწერე. ზუსტად არ მახსოვს“.

სამცხე-ჯავახეთის საოლქო პროკურატურის კანცელარიის უფროსი ხათუნა მურადაშვილი აცხადებს, რომ პარასკევს საღამომდე კანცელარიაში პაპუაშვილის განცხადება არ შესულა.

გავრცელებული ინფრომაციით თანამდებობა დატოვა პაპუაშვილის მოადგილემ ალიკა მაისურაძემაც.

„სამხრეთის კარიბჭემ“ აღნიშნულის გადამოწმება მაისურაძესთანაც სცადა, თუმცა, მან ვინც მის პირად ნომერზე გვიპასუხა განაცხადა, რომ ეს ალიკა მაისურაძეს ტელეფონის ნომერი არაა.

პაპუაშვილი კი აცხადებს, რომ ინფორმაცია იმის შესახებ, დატოვა თუ არა მისმა მოადგილემაც თანამდებობა, არ აქვს. ოლქის პროკურორისა და მისი მოადგილის გადადგომის შესახებ არც საოლქო პროკურატურაში იციან.

შეგახსენებთ, რომ გიორგი პაპუაშვილი სამცხე-ჯავახეთის ოლქის პროკურორად გასული წლის 10 ნოემბერს დაინიშნა. 2012 წლის საპარლამენტო არჩევნების შემდეგ ეს თანამდებობა ვაკანტური ოთხი თვის განმავლობაში იყო.

[თამუნა უჩიძე, ახალციხე]