![სკანდალური საქმეები, რომელშიც ახალდანიშნული ოლქის პროკურორი ფიგურირებს სკანდალური საქმეები, რომელშიც ახალდანიშნული ოლქის პროკურორი ფიგურირებს](/uploads/posts/2012-11/1354013637_gv-1.jpg)
სამცხე-ჯავახეთის ოლქის პროკურორის თანამდებობა, რომელიც ოთხი თვის განმავლობაში იყო ვაკანტური, გიორგი პაპუაშვილმა დაიკავა.
ბიოგრაფია
გიორგი პაპუაშვილი 1963 წელს დაიბადა. სკოლა თბილისში დაამთავრა. უმაღლესი განათლება თბილისის სახელმწიფო უნივერსიტეტში მიიღო. მუშაობდა უზენაეს სასამართლოში სხდომის მდივნად. 1991-1995 წლებში იყო მოსამართლე წალკის რაიონში. 1995 -1997 წლებში მუშაობდა სამცხე-ჯავახეთის სამხარეო პროკურატურაში პროკურორის თანაშემწედ, შემდეგ თბილისში კრწანისის, მოგვიანებით კი მთაწმინდა-კრწანისის პროკურორის უფროსის თანაშემწედ. 2004-2005 წლებში იყო აჭარის ავტონომიური რესპუბლიკის პროკურორი, მერე კი აჭარის შინაგან საქმეთა მთავარი სამმართველოს უფროსი. 2005 წლიდან თავდაცვის სამინისტროში სამხედრო პოლიციის დეპარტამენტის პირველ მოადგილედ გამოძიების ხაზით მუშაობდა, პარალელურად იყო საქართველოდან რუსეთის სამხედრო ბაზების გაყვანის ერთ-ერთი წევრი. ქვეყნიდან რუსეთის ბაზების გაყვანის შემდეგ სამსახურიდან წამოვიდა და საადვოკატო საქმიანობას ეწეოდა. ოლქის პროკურორად დანიშვნამდე „ქართუ ბანკში“ პრობლემური სესხების განყოფილებაში ექსპერტად მუშაობდა.
პაპუაშვილი სამცხე-ჯავახეთის ოლქის პროკურორად 10 ნოემბერს დაინიშნა. აღნიშნული პოსტი 14 აგვისტოს ვაჟა ჩიტაშვილმა იმის გამო დატოვა, რომ მიმდინარე წლის საპარლამენტო არჩევნებზე “ერთიანი ნაციონალური მოძარაობიდან“ ახალციხის მაჟორიტარ დეპუტატად იყრიდა კენჭს.
პაპუაშვილს, მისი წინამორბედი, რომელიც ახლა ახალციხის მაჟორიტარი დეპუტატია, დადებითად ახასიათებს. ადვოკატები კი რომლებიც ბათუმში 2004-2005 წლებში საქმიანობდნენ, პაპუაშვილს ბევრ უკანონო დაკავებას, ასევე აბაშიძის ყოფილი ჩინოვნიკების ქონების განაწილებისას სხვადასხვა უკანონო ქმედებებს უკავშირებენ.
„პაპუაშვილს საპატიმროებიდან ჩამოჰყავდა ხალხი და აიძულებდა საპროცესო შეთანხმებაზე დათანხმებულიყვნენ. ფულებს აწერდა და ამ ვითომ ჯარიმებს რა ანგარიშებზე არიცხინებდა კაცმა არ იცის“, - ამბობს ადვოკატი რამინ პაპიძე.
„ნაციონალი“ გამგებლების საქმე
პაპუაშვილთან დაკავშირებული ყველაზე უფრო გახმაურებული ამბავი, რომელიც რევოლუციის შემდგომ აჭარაში სკანდალად იქცა, ხულოსა და შაუხევის „ნაციონალი“ გამგებლების დაკავება იყო. ხულოს გამგებელი ოთარ ცეცხლაძე და შუახევის გამგებელი ნოდარ ქარცივაძე ასლან აბაშიძის წინააღმდეგ ბრძოლაში აქტიურად იყვნენ ჩართულნი. სწორედ ამიტომ დაინიშნენ რევოლუციის შემდეგ გამგებლებადაც, თუმცა 2004 წლის 5 ოქტომბერს პაპუაშვილმა ორივე მათგანი ხე-ტყის გამო დააკავა.
მაშინ მთავრობის გადაწყვეტილებით აჭარაში სკოლები რემონტდებოდა. ამისათვის ხულოდან 500 კბ ხე-ტყე უნდა გასულიყო. თუმცა, როგორც ხულოს ყოფილი გამგებელი და ახლა ბათუმის უნივერსიტეტის ასოცირებული პროფესორი ოთარ ცეცხლაძე ამბობს, ხულოდან მეტი ხე-ტყე იზიდებოდა, ოღონდ ადიგენისთვის გამოყოფილი ბილეთებით, ანუ რესურსისა და ყველა საჭირო გადასახადს ადიგენში იხდიდნენ, ხეს კი ხულოში ჭრიდნენ: „ადიგენში ვანო მერაბიშვილის ბიძა, რომელსაც ჰქონდა ფირმა „პაკო“ და ხე-ტყის ბიზნესით იყო დაკავებული პირდაპირ იერიშებზე გადმოდიოდა ჩვენთან. მასალის დიდი ნაწილი ვალის საბაჟოთი გაჰქონდათ თურქეთში, ნაწილი კიდევ ხულოთი. არანაკლები პატარ-პატარა მაფიოზები იყვნენ ხულოშიც და მათ ალიანსი ჰქონდათ. მერაბიშვილის მაფიას დიდი დისკომფორტი შევუქმენი“.
ხე-ტყით დატვირთული მანქანა ცეცხლაძემ ხულოში 5 დღის განმავლობაში გააჩერა. მასალას 6 კბ-ის ბილეთი აკლდა.
„ოთარს ეუბნებოდნენ, რომ ამ მასალის შესახებ ვარშალომიძემ იცოდა და მანქანა უნდა გაეტარებინა, მაგრამ ამბის მიმტანს არ დაუჯერა“, - ამბობს ცეცხლაძის ერთ-ერთი ადვოკატი რამინ პაპიძე.
მეხუთე დღეს კი მანქანა რომლის გატარებასაც მთავრობის წარმომადგენლები ცეცხლაძეს სთხოვდნენ, გააპარეს და სწორედ ამ მანქანის გამო თავად ცეცხლაძე დააკავეს.
„ჩემი დაკავება რომ ძალიან ცუდად არ გამოჩენლიყო, შუახევის გამგებელიც მომაყოლეს, ისიც აბსოლიტურად არაფერ შუაში იყო“, - გვიყვება ცეცხლაძე.
დაკავებას გადარჩა ქედის გამგებელი, რადგან აქ, მაშინ მიხეილ მაჭავარიანის ცოლის ბიძა მუშაობდა და დაინდეს.
„ქედაში ეტყობა აფრინდა მანქანა და გზაზე არ გამოიარა“, - ხუმრობს ცეცხლაძე.
ხუთ ოქტომბერს დაკავებულები დანაშაულის არ არსებობის გამო 28-ში გაათავისუფლეს ისე, რომ სასამართლო არ გამართულა.
„გათავისუფლების საფუძველი ვითარების შეცვლა იყო. 2010 წლამდე მოქმედი სისხლის სამართლის საპროცესო კოდექსი სისხლის სამართლის შეწყვეტის ასეთ საფუძველს ითვალისწინებდა. ნასამართლობა არ დამდგარა, მაგრამ ეს მარეაბილიტირებელი საფუძველი არ არის“, - გვიხსნის ადვოკატი და ამატებს, რომ მაშინ ცეცცხლაძე აჭარის ავტონომიური რესპუბლიკის მთავრობის თავმჯდომარის ლევან ვარშალომიძის ინტერესებს შეეწირა - პაპუაშვილმა ვარშალომიძის ინტერესი გაატარა“.
პაპუაშვილი კი პირიქით აცხადებს: „ვარშალომიძისა და მერაბიშვილის ინტერესების გამტარებლები თავად გახლდნენ. დავალებული ჰქონდათ ხე-ტყის გარკვეული ლიმიტით გატანა, იმისთვის, რომ სკოლების რეაბილიტაცია მომხდარიყო. მათ ისარგებლეს ამით და გამოიტანეს უფრო მეტი. ეს დააფიქსირეს ჩემმა თანამშრომლებმა და დავაკავეთ კანონის სრული დაცვით“.
რაც შეეხება მტკიცებულებებს, მათი არსებობა-არარსებობის შესახებ პაპუაშვილი ამბობს, რომ არაფერი იცის: „გამოძიებამ რა ქნა არ ვიცი, მალევე წამოვედი აქედან“.
დატოვა თუ დაატოვებინეს პაპუაშვილს აჭარა?
პაპიძის თქმით, პაპუაშვილს აჭარა საკუთარი სურვილით არ დაუტოვებია. მას სამსახური იმ მიზეზით დაატოვებინეს, რომ მისი და მაშინდელი მთავრობის ბიზნესინტერესები ერთმანეთს დაეჯახა: „იმისთვის კი არ დაუსჯიათ პაპუაშვილი, რომ უკანონოდ აპატიმრებდა ხალხს, ქონების დაგროვება რომ დაიწყო, ეს აღარ მოეწონათ. მან ხელვაჩარუში დიდი ქონება შეიძინა“.
პაპუაშვილმა, რომ აჭარაში „ფული აკეთა“ ამაზე ცეცხლაძეც საუბრობს: „გადაპარსა ბათუმი. როგოც ამბობენ, ამას ვერ დავადასტურებ, საკურორტო ზონაში, ზღვისპირთან ახლოს, ათობით ჰექტარი ქონება აქვს მიტაცებული და ნათესავებზე აქვს გაფორმებული“.
ოლქის პროკურორი აჭარაში რაიმე ბიზნესინტერესებს კატეგორიულად გამორიცხავს. კითხვაზე, თუ რატომ აღარ სურდა მაშინდელ ხელისუფლებას იგი პროკურორად, შემდეგ კი აჭარის შინაგან საქმეთა მთავარი სამმართველოს უფროსად დარჩენილიყო , გვპასუხობს რომ ამის შესახებ მაშინდელ მთავრობას უნდა ვკითხოთ: „ ალბათ მათ სხვა პოლიტიკის გატარება სურდათ რეგიონში. უკანონობას არასდროს დავუჭერდი მხარს“.
რატომ დანიშნეს პაპუაშვილი ოლქის პროკურორად?
პაპიძე სამცხე-ჯავახეთში პაპუაშვილის ოლქის პროკურორად დანიშვნის გამო გაკვირვებულია: „მმართველი გუნდი ცდილობს, რომ სამართალდამცავ სტრუქტურებში თავიანთი წარმომადგენლები ჰყავდეთ, მაგრამ პაპუაშვილის შემთხვევაში სერიოზულად შეეშალათ“.
მისივე თქმით, „ქართულ ოცნებას“ კადრების პრობლემაც აქვს: „ფიქრობენ, რომ ვინც სააკაშვილმა გადააგდო, ყველა პატიოსანია“.
ცეცხლაძე პაპიძის მოსაზრებას იზიარებს და ამბობს, რომ ახლა კადრების კრიზისია.
„პაპუაშვილმა თავი წამებულად გაასაღა. დარწმუნებული ვარ, არ იციან მისი ბიოგრაფია. იგივეს გააკეთებს სამცხე-ჯავახეთშიც, ეგ ამ ხელისუფლებას დიდებას ვერ მოუტანს. ღმერთმა ქნას, ვცდებოდე, გამიხარდება, - აცხადებს ცეცხლაძე და ამატებს, რომ თხემით ტერფამდე „ქართული ოცნების“ მხარდამჭერია - რომ დამიჭრეს და ციხიდან გამოვედი, იმ ხელისუფლებაზე ცუდი არ მითქვამს, ვამბობდი, ახალგაზრდები არიან და შეეშალათ-მეთქი. მაგრამ, რომ ვნახე რასაც აკეთებდნენ, ოპოზიციაში გადავედი და ღიად ვუჭერდი მხარს „ქართულ ოცნებასაც“.
ერთ-ერთი ადვოკატი, რომელიც პრესასთან ინკოგნიტოდ რჩება, ამბობს რომ პაპუაშვილი ის ადამიანია, რომელიც ყველაფერზე ხელისმომწერია: „გარდამავალ პერიოდში რიგი საქმეების საკეთებლად ეტყობა ასეთი ადამიანი სჭირდებათ“.
პაპუაშვილი ირწმუნება, რომ მას კარგად იცნობენ და ოლქის პროკურორად მისი დანიშვნის შესახებ არჩევანი სწორედ პროფესიონალიზმისა და საქმისადმი ერთგულების გამო გააკეთეს.
[თამუნა უჩიძე, ახალციხე]