სამცხე–ჯავახეთის სატყეო სამსახურის უფროსმა თანამდებობა დატოვა

გელდიაშვილმა "სამხრეთის კარიბჭესთან" სატელეფონო საუბარში განაცხადა, რომ თანამდებობა საკუთარი განცხადების საფუძველზე დატოვა, რადგან სამუშაოდ უკეთეს სამსახურში გადადის.

თემურ გელდიაშვილმა გათავისუფლების შესახებ განცხადება გუშინ, 19 ნოემბერს დაწერა. იგი ამ თანამდებობაზე ექვსი თვის განმავლობაში მუშაობდა.

ამ ეტაპზე სამსახურს ახალი უფროსი არ ჰყავს. ეროვნული სატყეო სააგენტოს სამცხე-ჯავახეთის სატყეო სამსახურში განმარტავენ, რომ ახალი უფროსის ან მისი მოვალეობის შემსრულებლის ვინაობა სავარაუდოდ ორშაბათს გაირკვევა.

საქართველოს გარემოსა და ბუნებრივი რესურსების დაცვის სამინისტროს, სსიპ ეროვნული სატყეო სააგენტო 2013 წლის 14 მაისს შეიქმნა. სამსახურის შექმნიდან დღემდე სამცხე–ჯავახეთის სატყეო სააგენტოს ოთხი დანიშნული უფროსი ჰყავდა.

2013 წლის 14 მაისიდან ამ პოსტზე ზვიად ლომსაძე მუშაობდა, რომელმაც თანამდებობა 2013 წლის 14 ივნისს, სამსახურის ვადის გასვლის გამო დატოვა. 2013 წლის 23 ივლისიდან ლევან ხოზრევანიძე დაინიშნა, რომელიც 2014 წლის 1 აპრილამდე მუშაობდა, შემდეგ კი სხვა თანამდებობაზე გადაიყვანეს. 2014 წლის 10 აპრილიდან ამ პოსტზე ირაკლი გოგია მუშაობდა, რომელიც შემდგომ თემურ გელდიაშვილმა შეცვალა.

[თამარ თოთაძე, ახალციხე]