ახალციხის მუნიციპალიტეტის გამგებლის მოადგილემ თანამდებობა დატოვა

კარლენ მანასიანმა სამსახურიდან გათავისუფლების შესახებ განცხადება 28 აპრილს დაწერა. მან სამსახურიდან გათავისუფლება ოჯახური პირობების გამო ითხოვა. მანასიანის განცხადება ახალციხის მუნიციპალიტეტის გამგეობაში დღეს, 3 მაისს დააკმაყოფილეს.

მანასიანი შვებულებიდან იმ დღეს უნდა გამოსულიყო, როცა გათავისუფლების შესახებ განცხადება დაწერა. იგი შვებულებაში 20 აპრილს გავიდა. ამავე დღეს მოხდა შემთხვევა, რომელზეც ახალციხის რაიონულმა სამმართველომ ძიება სსკ–ის 125–ე მუხლით დაიწყო, რაც ცემას გულისხმობს.

შეგახსენებთ, რომ „კადასტრი რეესტრი პლუსის“ დირექტორი დავით გოგოგლაძე კარლენ მანასიანს ცემაში ადანაშაულებს.

გამგებლის უკვე ყოფილი მოადგილის მობილური გამორთულია, გამგეობაში კი იმაზე, უკავშირდება თუ არა მომხდარს მანასიანის სამსახურიდან წასვლა, არ საუბრობენ.

კარლენ მანასიანი გამგებლის მოადგილედ ერთი წლის წინ, 2015 წლის 23 მარტს დაინიშნა.

[თამუნა უჩიძე, ახალციხე]