სამცხე-ჯავახეთის ოლქის პროკურორად ლევან პაქსაშვილი დაინიშნა

საქართველოს მთავარი პროკურატურის საზოგადოებასთან ურთიერთობის დეპარტამენტის უფროსის ხათუნა პაიჭაძის განცხადებით, ლევან პაქსაშვილი სამცხე-ჯავახეთის ოლქის პროკურორად სამი დღის წინ დაინიშნა.

„ბრძანება პარასკევს დაიწერა. დღეს კი მთვარმა პროკურორმა დეპარტამენტის ხელმძღვანელებთან და ოლქის პროკურორებთან პირველი შეხვედრაც გამართა“, - განაცხადა პაიჭაძემ „სამხრეთის კარიბჭესთან“ სატელეფონო საუბარში.

პაქსაშვილი ჯერ სამცხე-ჯავახეთის საოლქო პროკურატურაში თანამშრომლებს არ შეხვედრია. პაიჭაძის თქმით, ის ახალციხეში სავარაუდოდ ხვალ ჩამოვა: „ხვალვე გამოქვეყნდება მთავარი პროკურატურის ვებგვერდზე ყველა ახლადდანიშნული ოლქის პროკურორის ავტო-ბიოგრფიაც“.

შეგახსენებთ, რომ ოლქის ყოფილმა პროკურორმა გიორგი პაპუაშვილმა თანამდებობა გასულ კვირას დატოვა. მან მიზეზად ჯანმრთელობის პრობლემები დაასახელა.

[თამუნა უჩიძე, ახალციხე]