წინუბნის ტყეში მბეჭდავი ქერქიჭამიას წინააღმდეგ სანიტარული ჭრები დაიწყება

წინუბნის ტყე გასულ კვირას ტყის დაცვის სამართველომ შეამოწმა. დადგინდა, რომ ხეებს მბეჭდავი ქერქიჭამია ახმობს.

„წინუბნის ტყეში, როგორც მთელს რეგიონში, სადაც ნაძვის და ფიჭვის მასივია, მბეჭდავი ქერქიჭამიაა გავრცელებული. ჩვენი სამსახურის მხრიდან მომდევნო კვირას კიდევ ერთხელ განხორციელდება ტყის დათვალიერება“, – გვითხრა ტყის დაცვის სამმართველოს უფროსმა, გიორგი მამადაშვილმა.

მისი განმარტებით, მავნებლის გავრცელების პრევენციის მიზნით, დაზიანებული ხეები უნდა მოიჭრას.

„დაზიანებული ხეების ჭრა უნდა მოხდეს, რათა დაიწყოს ტყის გათავისუფლება მავნებლისგან და სანიტარული მდგომარეობაც გაუმჯობესდება. მოჭრას დავიწყებთ, მაშინ, როცა ადგილობრივებისაგან მოთხოვნა იქნება საშეშე მასალის გაცემაზე“, – გვითხრა მამადაშვილმა.

ამ დროისთვის უცნობია, კონკრეტულად რა ფართობზეა გავრცელებული წინუბნის ტყეში „მეჭდავი ქერქიჭამია“.

„ჭრის დროს, როცა ტყეკაფი გამოიყოფა მაშინ დაზუსტდება რამდენი კუბამეტრი მოიჭრება და რა ფართობზეა გავრცელებული მავნებელი“, – ამბობს მამადაშვილი.

ტყის დაცვის სამმართველოს სამსახურის მონაცემებით, სამცხე–ჯავახეთში პირველად „მბეჭდავი ქერქიჭამია“ 2011 წელს გაჩნდა. როგორც სამმართველოში აცხადებენ, მავნებელი რეგიონის თითქმის ყველა მუნიციპალიტეტში, დაახლოებით 26 000 ჰექტარზეა გავრცელებული.

[ნუკა სტეფნაძე, ახალციხე]