ბორჯომში მბეჭდავი ქერქიჭამიას წინააღმდეგ სანიტარული ჭრები განახლდება

სანიტარულ ჭრებთან დაკავშირებით, ინფორმაციის მიწოდების მიზნით, ეროვნული სატყეო სააგენტოს უფროსის მოადგილე ნათია იორდანიშვილი ბორჯომის მოსახლეობას შეხვდა და სანიტარული ჭრების მნიშვნელობაზე ესაუბრა.

„ხშირ შემთხვევაში სანიტარული ჭრები საზოგადოების მწვავე განხილვის საგანია და ტყის არამიზნობრივ ჭრასთან ასოცირდება. სანიტარული ჭრების დანიშნულებაა დაავადებული ტყის კორომების გაჯანსაღება. ჭრაში ინიშნება ისეთი ხეები, რომელთა ადგილზე დატოვება განაპირობებს მავნებელ-დაავადებების გავრცელებას, – აცხადებენ სატყეო სააგენტოში.

სამცხე-ჯავახეთის ტყის ფონდის ტერიტორიაზე არსებულ ნაძვნარ კორომებში მავნებელი-მბეჭდავი ქერქიჭამია Ips typographus მასიურადაა გავრცელებული.

ეროვნულ სატყეო სააგენტოში აცხადებენ, რომ 2013 წელს სამცხე-ჯავახეთის ტერიტორიაზე არსებულ ტყეებში 26000 ჰა ფართობზე, განხორციელდა ტყეებში მავნებლის გავრცელების შესწავლა. მიღებული დასკვნების საფუძველზე დაიგეგმა ბრძოლის ღონისძიებები. განთავსდა ფერომონიანი მწერმჭერები, სადაც მუდმივად ტარდებოდა მონიტორინგი, მწერმჭერებში მავნებლის შეგროვება და განადგურება. აღნიშნული ღონისძიება გაგრძელდება 2019 წელსაც.

სულ 2013-2018 წლებში დაჭერილი და განადგურებული იქნა 15 მილიონამდე ქერქიჭამია.

ასევე, აუცილებელია ხმელი და დაავადებული ხეების ფართობიდან გამოტანა, რაც ხორციელდება სანიტარული ჭრების საშუალებით. ეროვნული სატყეო სააგენტო ბორჯომის პლატოს ტერიტორიაზე, სანიტარულ ჭრებს 2016 წლიდან 269 ჰა ფართობზე ახორციელებს.

„ჩვენი მიზანია მოსახლოებას მუდმივად მივაწოდოთ განახლებული ინფორმაცია სააგენტოს საქმიანობაზე და განსაკუთრებით ამ ტერიტორიაზე განსახორციელებელ ღონისძიებებთან დაკავშირებით, რადგან მათი ჩართულება გახლავთ უპირატესი ჩვენი საქმიანობის წარმატებით განხორციელებისათვის“, – ამბობს ეროვნული სატყეო სააგენტოს უფროსის მოადგილე ნათია იორდანიშვილი.

სააგენტოში აცხადებენ, რომ სანიტარული ჭრის ჩატარების შემდეგ, ტყეების მდგომარეობის გაუმჯობესება საგრძნობლადაა შესამჩნევი. ასევე მეტყევე სპეციალისტების მიერ, ხორციელდება ტყის აღდგენის ღონისძიებები. 2017 წლიდან მიმდინარეობს ტყის ბუნებრივი განახლების ხელშეწყობა 27,7 ჰა ფართობზე. ამ ღონისძიებების შემდეგ ხდება ტყეებში სანიტარული ჭრების შედეგად გამოთავისუფლებული ადგილების შევსება და შესაბამისად, ტყის კორომების შემადგენლობის გაუმჯობესება.

[sknews.ge]