მესხეთში ტყეს მავნებლები აზიანებენ – რა წერია დასკვნაში

აწყურში, თისელში, ურაველში, სვირსა და ბაკურიანში, როგორც ხელოვნური, ასევე ბუნებრივი ტყეები 29–30 მაისს შეისწავლეს. დასკვნის მიხედვით, ფიჭვის და ნაძვის ხეებს მავნებლები: მბეჭდავი ქერქიჭამია, ასევე დიდი და პატარა მებაღე ანადგურებს.

როგორც ტყის აღრიცხვისა და კვლავწარმოების დეპარტამენტის ტყის მოვლა-აღდგენის სამმართველოს მთავარი სპეციალისტის გიორგი მამადაშვილი ამბობს, თისელში, ხელოვნურად გაშენებულ ტყეში მწერის, დიდი მებაღის და მცირე მებაღის არსებობდა დადასტურდა.

„ადგილზე კვლევისას ნანახი იქნა ზეხმელი და ძლიერ დაზიანებული ფიჭვის ხეები, უმნიშვნელო რაოდენობით დაფიქსირდა მოთხრილ-მოტეხილი ხეები. ცალკეული ეგზემპლარების დეტალური შესწავლისას ქერქსა და ქერქის ქვეშ ნანახი იქნა ფიჭვის დიდი მებაღის მიერ გამოწვეული დაზიანებები, კერძოდ: გამოსაფრენი ხვრელები, ნაღრღენი და სასვლელები“, – წერია დასკვნაში.

რაც შეეხება სვირის ხელოვნურ ტყეს, მიუხედავად იმისა, რომ აქ ხმობადი და მოთხრილ–მოტეხილი ხეები ნახეს, ამ ტერიტორიაზე რაიმე საშიში მავნებელი, ან დაავადება არ დაუფიქსირებიათ.

ურაველში კი დასკვნის მიხედვით, ნაძვის კორომებს მბეჭდავი ქერქიჭამია ანადგურებს: „დიდი რაოდენობით დაფიქსირდა ნაძვის ზეხმელი და ხმობადი ეგზემპლარები, ნანახი იქნა ასევე მოთხრილ-მოტეხილი ხეებიც. ნაძვის ქერქსა და მერქანზე გამოვლინდა მბეჭდავი ქერქიჭამიას მიერ გამოწვეული დაზიანებები, ნაძვებთან ერთად დაფიქსირდა ზეხმელი ფიჭვებიც, რომლებზეც მხოლოდ მეორადი მავნებლების, კერძოდ: ხარაბუზებისა და პეწიანიების სხვადასხვა სახეობების მიერ გამოწვეული დაზიანებები იქნა ნანახი“.

მბეჭდავი ქერქიჭამია ანადგურებს ბაკურიანის, კერძოდ ციხისჯვრის სატყეო უბანში არსებულ ნაძვის ხეებსაც.

რაც შეეხება საყუნეთის ფიჭვის ხელოვნურ ტყეს, აქ ხეებს მწერი, დიდი მებაღე აზიანებს.

ეროვნული სატყეო სააგენტოს ინფრომაციით, მიუხედავად იმისა, რომ ფიჭვის დიდი მებაღე მეორადი მავნებელია, შესაძლოა იგი რიგ შემთხვევებში (კლიმატი და სხვა გარემო ფაქტორები) პირველ მავნებლად გადაიქცეს. ამიტომ მიზანშეწონილი იქნება, თუ ის ფართობები, სადაც დაზიანებული ხეებია, სანიტარული ჭრის წესით გაიწმინდება.

[თინათინ ზაზაძე, ახალციხე]