სოფელ წინუბნის ტყეში მავნებლის გამო ხეები ხმება

ფოტო - არქივი

სოფელ წინუბანში მცხოვრებლები შიშობენ, რომ ტყეში ხეების მასობრივად გახმობის მიზეზი „ლაფანჭამიაა“. „თუ დროულად არ მიხედეს, შეიძლება მთელი ტყე დააზიანოს ამ მავნებელმა“, - აცხადებენ ადგილობრივები.

„სამხრეთის კარიბჭესგან“ მიწოდებული ინფორმაციის საფუძველზე, ტყის დაცვის სამმართველომ წინუბანში პრობლემის შესწავლა დაიწყო. მათი განცხადებით, აღნიშნულ ტერიტორიაზე არა „ლაფანჭამია“, არამედ „მბეჭდავი ქერქიჭამიაა“ გავრცელებული.

„რეგიონის სატეყეო სამსახურის მიერ მოხდა გადამოწმება აღნიშნული ფართობის. არასპეციალისტები ხშირად ლაფანჭამიას ეძახიან, თუმცა ეს ბოლო წლებია სამცხე–ჯავახეთში მბეჭდავი ქერქიჭამიაა გავრცელებული“, – ამბობს ტყის დაცვის სამმართველოს უფროსი გიორგი მამადაშვილი.
ტყის დაცვის სამმართველოში აცხადებენ, რომ მათი წარმომადგენლები აღნიშნულ ტერიტორიას კიდევ ერთხელ სავარაუდოდ, 26 ივნისს დაათვალიერებენ და პრობლემას შეისწვალიან.

„ჩვენი სამსახური სისტემატურად დადის სამცხე–ჯავახეთში შესამოწმებლად და აღნიშნულ ტერიოტორიაზე კიდევ ერთხელ, ამ კვირის ბოლოს, მოხდება გადამოწმება ამ ფართობის. გარდა იმისა, რასაც ჩვენ ვამოწმებთ, როცა ინფორმაცია შემოდის ადგილზე მივდივარათ, რათა დროულად მოხდეს გადამოწმება და დაიგეგმოს შესაბამისი ღონისძიებები“, – გვითხრა მამადაშვილმა.

მისივე განმარტებით, იქ, სადაც მავნებელია გავრცელებული, სანიტარული ჭრა განხორციელდება: „ზოგადად, იქ, სადაც მასობრივად არის მბეჭდავი ქერქიჭამია გავრცელებული, სანიტრულ ჭრებს ვახორციელებთ ხოლმე. რაც შეეხება წინუბნის ტყეს, აქ ერთეულის სახითაა ხეების ხმობა, რომლებზეც სანიტარული ჭრა განხორცილედება“.

ეროვნული სატყეო სამსახურის ინფორმაციით, სამცხე–ჯავახეთში „მბეჭდავი ქერქიჭამია“ 2011 წლიდან ფიქსირდება, ხოლო 2012 წლიდან სააგენტომ ფერომონიანი მწერსაჭერები განათავსა და დაიწყო სანიტარული ჭრები. მათივე განმარტებით, ყოველწლიურად, ფერომინიანი მწერსაჭერების მონიტორინგი სეზონზე 10–12 ჯერ ხდება. (განთავსებიდან 10–14 დღის შუალედში) ამ დროის განმავლობაში, „ლაფანჭამია“ არ დაფიქსირებულა.

[ნუკა სტეფნაძე, ახალციხე]