საყუნეთის მკვიდრი, „ნაციონალური მოძრაობის“ აქტივისტი 38 წლის ირმა გელაშვილი სოფელში დავით ბაქრაძის საპრეზიდენტო კანდიდატად წარსადგენად სოფელში ხელმოწერებს აგროვდა.
„ხელმოწერებს ვაგროვებდი იმისთვის, რომ ცესკოში ბაქრაძე პრეზიდენტობის კანდიდატად წარედგინათ. საყუნეთში ერთ-ერთ ოჯახში მივედი, იქ ახალგაზრდები ისხდნენ სუფრასთან და სვამდნენ. ოჯახის წევრებმა რომ ხელი მომიწერეს, შემდეგ ახალგაზრდებისკენ გადავინაცვლე. მათთან ერთად იჯდა ბიძაჩემიც, სანამ ის მოვიკითხე და პირადობა მომცა, რომ მისი ხელმოწერაც დამეფიქსირებინა, სუფრასთან მჯდომმა ამირან ბუხრიკიძემ გადაულაპარაკა ბესო ქუქჩიშვილს და მათ ისეთი სიტყვიერი შეურაცხყოფა მომაყენეს იქ ვეღარ გავჩერდი და მაშინვე წამოვედი“, - გვიყვება გელაშვილი.
აქედან მან ხელმოწერების შესაგროვებლად სხვა ოჯახში გადაინაცვლა, სწორედ აქედან გამოსვლისას დახვდა მას კართან ბესო ქუქჩიშვილი და მოსთხოვა მისთვის ის ფურცლები ეჩვენებინა, რომლებიც ხელში ეჭირა: „შემოვარდა ეზოში და მიყვირა, მაჩვენე რა ფურცლებს დაატარებო. ვუთხარი შენ ვინ გეკთხება, შენ ხომ არაფერს გაძალებ და ნუ კადრულობ უკადრებელს მეთქი. მერე დაიწყო, იქ მოხვედი და მაგიდა აგვიშალეო და ისეთი შემომარტყა სახეში, თვალებში დამიბნელდა“.
როგორც გელაშვილი ამბობს, ყურიდან სისხლი წამოუვიდა, ამის მერე კი ყურიდან სითხე სდის.
„ეს ამბავი ფეისბუქზე დავწერე, მივწერე დავით ბაქრაძესაც. ამიტომ მოჰყვა რეაგირება და მომხდარით სამართალდამცავები დაინტერესდენენ, - ამბობს გელაშვილი.
იგი ახალციხის რაიონულ სამმართველოში მოწმის სტატუსით უკვე დაკითხეს: „დამინიშნეს ექსპერტიზა. ექსპერტმა ყურის ექიმთან გამიშვა მაგრამ ჯერ ვერ მივედი, ფული არ მაქვს“.
გელაშვილის განცხადებით, ამირან ბუხრიკიძე, რომელმაც მას სიტყვიერი შეურაცხყოფა მიაყენა, „ქართული ოცნების“ აქტივისტია. „ქართული ოცნების“ ახალციხის შტაბში კი გელაშვილის ნათქვამს კატეგორიულად უარყოფენ.
„არც საყუნეთში მომხდარის შესახებ მსმენია რაიმე და არც ეგეთს ვიცნობთ ვინმეს. ბუხრიკიძე ჩვენი აქტივისტი არაა“, - გვითხრა „ქართული ოცნების“ ახალციხის შტაბის უფროსმა მალხაზ ჟუჟუნაძემ.
ამირან ბუხრიკიძეს „სამხრეთის კარიბჭე“ ტელეფონით დაუკავშირდა, თუმცა მას შემდეგ რაც მან გაიგო, რომ ჟურნალისტი ესაუბრებოდა და თან იმ ფაქტის შესახებ რომელიც საყუნეთში მოხდა, სიტყვიერი შეურაცხყოფა მიეყენა იმ ადამიანებს ვინ ამ საქმეში არიან ჩართულნი და ტელეფონი გაგვითიშა.
რაც შეეხება ბესო ქუქჩიშვილს, 5-დღიანი ამაო მცდელობის მიუხედავად „სამხრეთის კარიბჭემ“ მასთან დაკავშირება ვერ შეძლო.
„ერთიანი ნაციონალური მოძრაობის“ ახალციხის რაიონული ორგანიზაციის თავმჯდომარის დროებით მოვალეობის შემსრულებელი და გუბერნატორის მოადგილე გელა დემეტრაძე აცხადებს, რომ მათ აქტივისტზე აქამდე მსგავს შემთხვევბს ადგილი არ ჰქონია: „ეს იყო პირველი. ვფიქრობ დროა ამ ქვეყანაში ვისწავლოთ პოლიტიკური კულტურა. საქმეზე ძიება დაწყებულია და ვიმედოვნებ, რომ დამნაშავე სათანადოდო დაისჯება“.
23 აგვისტოს საყუნეთში მომხდარს ახალციხის რაიონული სამმართველო იძებს.
„ძიება სისხლის სამართლის კოდექსის 125-ე მუხლით მიმდინარეობს“, - ამბობს ახალციხის რაიონული პროკურორი გოდერძი გოდერძიშვილი.
[თამუნა უჩიძე, ახალციხე]