‘ჩიხი’ – ახალციხელი სტუდენტის რეალურ ისტორიაზე დაფუძნებული რომანი

ანაბელ შველიძის რომანი „ჩიხი“, რომელიც ლიტერატურულ კონკურსში მონაწილეობს ოჯახში ძალადობას ეხება.

ანაბელი გვიყვება რომ ნაწარმოების პერსონაჟები რეალური პიროვნებები არიან, რეალური ცხოვრებით.

„რაც იქ ხდება, ხდება რეალურ დროშიც. ვფიქრობ რომ ეს საზოგადოებამ უნდა იცოდეს და როგორც ჩემი პერსონაჟები ამბობენ, იქნებ ეს შეცდომები აღარ გაიმეოროს მკითხველმა რეალურ ცხოვრებაში. გავასაჯაროვე იმ ადამიანებისთვის, ვისაც სჭირდება გამბედაობა, რომ ღიად ილაპარაკონ და შეებრძოლონ იმ პრობლემებს, რაც „ჩიხშია“ მოყვანილი. მინდა ყველა იმ ადამიანმა გაიგოს, ვინც ვერ ბედავს ხმის ამოღებას იმ პრობლემებზე, როგორიც, მაგალითად ოჯახში ძალადობაა, მინდა ამ ადამიანებმა გაიგონ რომ ისინი მარტო არ არიან. ეს არის ჩემი პერსონაჟების და ჩემი მიზანი“ – ამბობს ანაბელი.

25 წლის ანაბელმა თავისი ნაწერების გასაჯაროება რამდენიმე თვის წინ გადაწყვიტა, როგორც გვიყვება ჩანაწერებს 12 წლიდან აკეთებს. სწორედ ამ ასაკში დაწერა თავისი პირველი მოთხრობაც, რომელსაც „შენი სახელით“ დაარქვა.

„ეს იყო ჩემი პირველი ნაწარმოები, რომელიც შურისძიებას ეხებოდა. ასეთ გრძნობებზე დაფიქრება და ჩაღრმავება ჩემთვის შეუძლებელი აღმოჩნდა წერის გარეშე. წერა ჩემთვის ბავშვობის სიყვარულია, ბავშვობის ოცნება. ეს არის ჩემთვის იგივე, რაც ადამიანისთვის ჟანგბადი. ბავშვობიდან ასე გამოვხატავდი გრძნობებს, დამოკიდებულებებს, ემოციებს და ახლაც, პირველ რიგში ეს გამოხატვის საშუალებაა“ – გვიყვება ანაბელი.

მისი თქმით, საკუთარი ნაწერების გასაჯაროება ადვილი არ ყოფილა, თუმცა ბავშვობის ოცნებაზე ხელის აღება – უფრო რთული აღმოჩნდა, ამიტომ ერთ დღესაც გადაწყვიტა თავისი შემდეგი ნაწარმოები, „პაზლების ქურდი“ უფრო ფართო აუდიტორიისთვის ეჩვენებინა.

„მანამდე ჩემი არცერთი ნაწერი არ მქონდა გასაჯაროებული. არც არავინ იცოდა რომ ვწერდი. რამდენიმე თვეა რაც გადავწყვიტე, რომ ჩემი ნაწერები საჯარო ყოფილიყო. „პაზლების ქურდის“ გამოხმაურებამ ბიძგი მომცა რომ უფრო მეტი მეწერა, რადგან საკმაოდ ბევრმა ადამიანმა ნახა და მოეწონა. სწორედ ამიტომ გადავწყვიტე „ჩიხიც“ გამომეტანა საჯაროდ“.

ანაბელის თქმით, მთავარი მოტივატორი, რამაც წერის გაგრძელების ბიძგი მისცა, დედა იყო, რომელიც მის ნაწერებს ყოველთვის კითხულობდა.

„დედაჩემი რომ არა, წერას ვერ და არ გავაგრძელებდი, სწორედ ის იყო პირველი ადამიანი, ვინც ჩემი ნაწერები წაიკითხა და მითხრა რომ წერა არ შემეწყვიტა. დედაჩემის ბიძგი იყო, რომ გავაგრძელე წერა და ისიც რომ ნაწერების გასაჯაროება გადავწყვიტე. მანამდე საკმაოდ არასერიოზულად აღვიქვამდი ამ ყველაფერს და ეს მხოლოდ ჩემი გრძნობების გამოხატვა იყო, რომელიც ჩემთან უნდა დარჩენილიყო“

ანაბელის რომანი „ჩიხი“ ლიტერატურულ კონკურსში „გახდი ბესტსელერის ავტორი“ პირველი ტურის სამ საუკეთესოს შორის მოხვდა. წინ კი მეორე–გადამწყვეტი ტურია, სადაც 16 ნაწარმოებიდან სამი რჩეული გამოვლინდება, რომელსაც პალიტრა L დაბეჭდავს.


[რობი ზარიძე, ახალციხე]