მესხეთის თეატრის მსახიობის წარმატება ბარსელონაში

ოთხწლიანი პაუზის შემდეგ, მესხეთის სახელმწიფო დრამატული თეატრის მსახიობი ნინო გორგაძე ბარსელონას თეატრალურ ცხოვრებაში ჩაება. ანტონიო ბუერდოს “ერთი კიბის ისტორიას” ქართველი მსახიობის მონაწილეობით ესპანელი მაყურებელი 22 სექტემბერს ნახავს. თეატრი თეატრანდრეუ (TEATRANDREU) სეზონს სწორედ ამ წარმოდგენით განაახლებს.

ნინო გორგაძემ 12 წლის განმავლობაში მესხეთის თეატრში 30-მდე როლი ითამაშა.

- “ჩემი ”თეატრალური ცხოვრება” ბავშვობიდან დაიწყო, უფრო სწორად თეატრი ჩემი ოცნება იყო. – იხსენებს გორგაძე – მახსოვს, დაახლოებით რვა წლის ვიყავი, სახატავი ალბომი რომ მქონდა, ხომ არ გგონიათ ვხატავდი, ხატვის ნიჭი არ მაქვს, ეს სახატავი ალბომი ჩემი საყვარელი მსახიობების ფოტოებით იყო სავსე, ყდაზე ეწერა "თეატრი ჩემი ცხოვრებაა". ამ ალბომს გვერდიდან არ ვიშორებდი, რომ ვიძინებდი ბალიშის ქვეშ მედო”.

მშობლები ნინოს ამგვარ საქციელს, ბავშვის კაპრიზად აღიქვამდნენ. ამიტომ მათი დაჟინებული თხოვნით, გორგაძემ 1993 წელს თბილისის სახელმწიფო უნივერსიტეტის ახალციხის ფილიალში ისტორიის ფაკულტეტზე ჩააბარა. თუმცა, მსახიობობაზე ოცნება არ შეუწყვეტია. ახლა უკვე პროფესიით არქეოლოგი მეგობრებს პატარა სპექტაკლებს უდგამდა.

გორგაძეს ოცნების ახდენაში უნივერსიტეტის სცენაზე გამოკრული განცხადება დაეხმარა, რომელიც სტუდენტებს მესხეთის თეატრში ეპატიჟებოდა.

- “თეატრალური სტუდია ყალიბდებოდა და ახალგაზრდები სჭირდებოდათ. ამ პროექტს ლია სულუაშვილი და ანზორ გვაძაბია ხელმძღვანელობდნენ”, - ამბობს გორგაძე.

პირველი სპექტაკლი, რომელშიც მონაწილეობდა “შაითან ხიხო” იყო. ამის შემდეგ გორგაძე სცენიდან აღარ ჩამოსულა.

“არაპროფესიონალი მსახიობი ვიყავი. ამიტომ 28 წლის ასაკში ამ ნაბიჯის გადადგმა მერთულებოდა, მაგრამ გადავწყვიტე თეატრალურ უნივერსიტეტში ჩამებარებინა”, - იხსნებს მსახიობი.

გორგაძე რუსთაველის სახელობის დრამისა და კინოს უნივერსიტეტში სამსახიობო ფაკულტეტზე 2003 წელს, ნანა დემეტრაშვილის ჯგუფში ჩაირიცხა. პარალელურად მუშაობდა მესხეთის თეატრში.

- “სასწავლებელი 2007 წელს დავამთავრე. ამავე წელს ეკონომიური მდგომარეობის გამო გადავწყვიტე ცოტა ხნით საზღვარგარეთ წავსულიყავი, იმ იმედით, რომ მალე დავუბრუნდებოდი ჩემს თეატრს”,- გვიყვება გორგაძე.

უკვე ოთხი წელია ნინო ბარსელონაშია. როგორც თავად ამბობს, აქ მსახიობობაზე ვერც კი იოცნებებდა, რომ არა ესპანელი მეგობრების დახმარება: “ჩემმა მეგობარმა ივან ხიმენესმა ნახა ჩემი სპექტაკლის ჩანაწერი “ათვინიერებენ მიმინოს” და მითხრა, რომ აუცილებლად უნდა მეფიქრა თეატრზე. სწორედ ის მეხმარება ესპანურად სიტყვების სწორად წარმოთქმასა და ენის სრულყოფილად დაუფლებაშიც”.

მეორე მეგობარმა რაფაელ ვიზქუეზმა კი თეატრანდრეუს ხელმძღვანელთან ფერნარდო კატალან კალვოსთან უშუამდგომლა.

- “ასე დაიწყო ჩემი თეატრალური ცხოვრება ბარსელონაში. დასმა ძალიან კარგად მიმიღო. პრემიერით ახალი სეზონი თეატრანდრეუში მალე განახლდება, უკვე ჩემი მონაწილეობით”, - ამბობს გორგაძე.

[თამუნა უჩიძე, ახალციხე]