‘მომავალში უფრო ტიტულოვან ჩემპიონატებს მოვიგებ’-15 წლის ძიუდოისტი ასპინძიდან

მეცხრეკლასელი მარიამი ყოველდღიურად ვარჯიშობს. ამბობს, რომ სწავლა და ვარჯიში ერთდროულად რთულია, თუმცა ცდილობს გაკვეთილებს არ ჩამორჩეს: „სკოლაში ყველანაირად მიწყობენ ხელს, ამიტომ მეც ყოველთვის დიდი პასუხიმგებლობით ვეკიდები სწავლას“.

მას შემდეგ, რაც ძიუდო მის ცხოვრებაში გაჩნდა, დაიწყო წინააღმდეგობებიც. მარიამის შემთხვევაში ერთ-ერთი დაბრკოლება საზოგადოების დამოკიდებულება იყო. თუმცა, მისი თქმით, ამას გავლენა არ მოუხდენია მის გადაწყვეტილებებზე, რადგან ოჯახი და მეგობრები მის მხარეს იყვნენ.

„როცა ჭიდაობა დავიწყე, ბევრმა მითხრა, რომ გოგო და ჭიდაობა? მაგრამ ამის მიუხედავად მაინც ჩემი ცხოვრების ნაწილად ვაქციე ძიუდო, მინდა რომ ამ მიმართულებით ჩემი ყველა ოცნება რეალობად ვაქციო“, - ამბობს მარიამი.

შარშან მარიამი საქართველოს ჩემპიონი გახდა. მოგვიანებით კი ანტალიაში, ევროპის თასზე მეორე შეხვედრაში დამარცხდა. შემდეგი იყო პოლონეთი, ევროპის ჩემპიონატი. პრიზით ვერც აქედან დაბრუნდა, თუმცა ახალი მიზნების დასახვაში ამას ხელი არ შეუშლია. სამ ნოემბერს თბილისში გიორგი ველიჯანაშვილის ხსოვნისადმი მიძღვნილ ძიუდოს საერთაშორისო ტურნირში პირველი ადგილი მოიპოვა.

სამომავლო მიზნებში ერთ-ერთი, იმ ჩემპიონატებში გამარჯვებაა, რომლებშიც შარშან მონაწილებდა. მანამდე კი საქართველოს ორგზის ჩემპიონი უნდა გახდეს. შემდეგ კი ანტალიის ევროპის თასი, რომელიც 2020 წელს, ხუთ თებერვალს გაიმართება.

მარიამის მთავარი მიზანი - მსოფლიო ჩემპიონატია, ოღონდ მანამდე ევროპა უნდა მოიგოს.



[რობი ზარიძე, ასპინძა]