მარხვა სოლიდარობის ნიშნად

ზურაბ მამალაძემ მუსლიმური წესით 7-დან 15 ნოემბრამდე იმარხულა. სამხრეთ საქართველოდან სატვირთო ვაგონებით 80 ათასამდე მაჰმადიანი მესხი სწორედ 15 ნოემბერს, 1944 წელში გაასახლეს.

"ქრისტიანი ვარ, მაგრამ ეს გავაკეთე ჩვენი მუსლიმი ძმების თანაგრძნობის და პატივისცემის მიზნით. როგორც ამას მუსლიმები აკეთებენ მარხვისას, დღისით არც წყალს ვსვამდი და არც ვჭამდი, - ამბობს მამალძე და ამატებს, რომ 15 ნომებრიდან მარხვა ქრისტიანული წესით გააგრძელა - ასე 9 დღე ვიმარხულებ და ამ მარხვის დასრულების შემდეგ გიორგობის ბრწყინვალე დღესასწაულიც დადგება, ვფიქრობ ეს სიმბოლურია".

მამალაძე ახალციხეს მაჰმადიანი მესხების მიმართ პატივისცემისა და თანადგომის გამოხატვის მიზნით ესტუმრა: "ჩემი მუსლიმი ძმებისთვის ჩამოვედი აქ".

იგი მაჰმადიანი მესხების პრობლემებს ორ ათეულ წელზე მეტია სწავლობს და ცდილობს ამ პრობლემების გადაწყვეტაში დაეხმაროს კიდეც მათ.

"1989 წელს შევქმენი საინიციატივო ჯგუფი, რომელმაც გამოაქვეყნა დეკლარაცია მაჰმადიან მესხებთან დაკავშირებით. ეს იყო ფერგანის ტრაგედიის შედეგი. ასევე, შევქმენი ორგანიზაცია, რომელსაც ერქვა "მაჰმადიანი მესხებისა და ინგილოების უფლებების აღდგენისა და დაცვის ლიგა", მოგვიანებით კი ეს ორგანიზაცია "მაჰმადიან მესხთა დაცვის ლიგად" გადავაკეთე", - გვიყვება მამალაძე და ამატებს, რომ მოგვიანებით ორგანიზაციას წევრები შემოეცალა და ამის გამო გაუქმდა კიდეც, მაგრამ ახლა მაჰმადიანი მესხების პრობლემების შესწავლას კვლავ თავიდან იწყებს.

მამალაძე მიიჩნევს, რომ საქართველოში მაჰმადიანი მესხები აუცილებლად უნდა დაბრუნდნენ: "მესხების გარეშე საქართველოს მომავალი არ აქვს. კანონი კი რეპატრიაციის შესახებ, რომელიც ჩვენმა ქვეყანამ მიიღო, სამარცხვინოა. ეს არის ანტიჰუმანური კანონი და ეს არის ამ ადამიანების დაცინვა".

მამალაძე მაჰმადიანი მესხების მიმართ საზოგადოების დამოკიდებულებაზეც საუბრობს: "ის, რომ ქართველი ხალხი არაა მზად მათ მისაღებად, ეს მაჰმადიანი მესხების შესახებ არასწორი ინფორმაციის გავრცელების ბრალია. სიმართლე თუ ეცოდინება ხალხს, დარწმუნებული ვარ ქუჩებშიც კი გამოვლენ, სამშობლოში მათი დაბრუნების მოთხოვნით".

[sknews.ge]