‘’მესხების გრძელი გზა შინისაკენ’’

გამოფენა სახელწოდებით - ’’არაღთქმული მიწა - მესხების გრძელი გზა შინისაკენ’’ გაიხსნა ევროკავშირის მიერ დაფინანსებული პროგრამის ’’1940-იან წლებში საქართველოდან გადასახლებულ პირთა და მათი შთამომავლების რეპატრიაციის ხელშეწყობა’’ ფარგლებში. პროექტს ახორციელებს ’’უმცირესობის საკითხთა ევროპული ცენტრი’’ ორგანიზაციასთან - ’’მოძრაობა შიმშილის წინააღმდეგ’’, თანამშრომლობით.

ფოტოები ძირითადად საქართველოსა და აზერბაიჯანშია გადაღებული და მათი ავტორი ქართველი ჟურნალისტი და ფოტოგრაფი თემო ბარძიმაშვილია. იგი ფოტოებზე ათი თვის განმავლობაში მუშაობდა. ფოტოგრაფი ამბობს, რომ მესხები გახსნილი ხალხია და მათთან მუშაობისას პრობლემები არ ჰქონია: ’’ჩემთვის კულტურული შოკი იყო, როცა ვხედავდი მათ შრომისმოყვარეობას, ეზოებს, ბოსტნებს. ძალიან თბილი და გახსნილი ხალხია’’.

ახალციხემდე მსგავსი ფოტოგამოფენა თბილისსა და ქუთაისში გაიმართა. ფოტოები ახალციხეში რამდენიმე დღე დარჩება, შემდეგ კი გამოფენა გორსა და ბათუმში გადაინაცვლებს. სამომავლოდ ფოტოების კრებულის სახით გამოცემაა დაგეგმილი.

[ნინო ნარიმანიშვილი]