”სამშობლო, რომელიც შორია”

დისკუსია დოკუმენტური ფილმის, სახელწოდებით, ”სამშობლო, რომელიც შორია” პრემიერას მოჰყვა.

პრემიერა დღეს, ახალციხის დემოკრატიული ჩართულობის ცენტრში შედგა და მას არამხოლოდ სამოქალაქო სექტორისა და ადგილობრივი ხელისუფლების წარმომადგენლები, არამედ თავად ფილმის გმირები, - სამცხე-ჯავახეთში მცხოვრები მუსლიმანი მესხებიც ესწრებოდნენ.

40-წუთიან დოკუმენტურ ფილმში, მუსლიმანი მესხების ისტორიული წარსული და დღევანდელობაა ასახული: დეპორტაცია, - სტალინის ბრძანება და ერთ ღამეში დაცლილი სამცხე-ჯავახეთის 220 სოფელი; ცხოვრება შორეულ და უცხო მხარეში; წინაპრების ოცნებად ქცეული სურვილი - დაბრუნება ისტორიულ სამშობლოში და სამშობლო - სადაც დაბრუნებულებს არაერთი პრობლემა ხვდებათ.
დოკუმენტური ფილმი სამცხე-ჯავახეთის რეგიონული ასოციაცია ,,ტოლერანტის“ დაკვეთით მომზადდა. ფილმის სცენარის ავტორი მარინე გერმანიშვილი, დამდგმელი რეჟისორი კი სანდრო ვახტანგოვია.

ფილმის გმირები ისხენებენ წინაპრების მონათხრობს, როგორ აყარეს ოჯახებიდან ერთ ღამეში და სატვირთო მატარებლით გაამგაზვრეს შორეულ შუა აზიაში; როგორ ცხოვრობდნენ ათეული წლები გადასახლებაში; როგორ დაკარგეს ნელ-ნელა ენა და ტრადიციები და რატომ ოცნებობდნენ სამშობლოში დაბრუნებაზე. ისტორიკოსები აანალიზებენ მომხდარს და აქვე მაყურებელს უხსნიან, ვინ და რატომ უწოდა ამ ადამიანებს ”თურქი-მესხი”.

ოზურგეთსა და სამცხე-ჯავახეთში მცხოვრები ოჯახები გვიყვებიან რა დაბრკოლებები შეხვდათ ისტორიულ სამშობლოში დაბრუნებულებს. რატომ ვერ იღებენ წლებია საქართველოს მოქალაქეობას, რაში უშლით ხელს მოქალაქეობისა და სტატუსის არქონა; რას ითხოვენ და რაში ადანაშაულებენ სახელმწიფოს.

ყველა ამ პრობლემის შესახებ ვრცლად ისაუბრეს დამსწრეებმა პრემიერის შემდეგ გამართულ დისკუსიაზეც.
ფილმის სცენები გადაღებულია თბილისში - გლდანის საერთო საცხოვრებელში, ოკუპაციის მუზეუმში, ოზურგეთში - ნასაკირალში, სამცხე-ჯავახეთში და აზერბაიჯანში.

დოკუმენტური ფილმი პროექტის ,,რეპატრირებულთა ჰუმანიტარული დახმარება ,,თვითრეპატრიაციის“ პრევენცია“ ფარგლებში მომზადდა.

[ნინო ნარიმანიშვილი, ახალციხე]