მეჩეთებში საჯარო ღვთისმსახურება აღდგა

ადიგენის სოფელ ჭელის მეჩეთში, კორონავირუსით გამოწვეული შეზღუდვების შემდეგ, პირველი ერთობლივი ლოცვა, 24 მაისს, რამადანის დღესასწაულზე აღევლინა. როგორც ტაძრის იმამი, ჯამბულ აბულაძე ამბობს, ამიერიდან, პარასკევის ლოცვები მრევლთან ერთად შესრულდება, დანარჩენ დღეებში კი რამდენიმე ადამინი იქნება მეჩეთში:

„დილის 06:00 საათსა და 24 წუთზე შედგა რამადანის სადღესასწაულო ლოცვა რეგულაციების გათვალისწინებითა და წესების დაცვით. ლოცვის აღდგენა დავიწყეთ პარასკევობით, სხვა დღეებში მეჩეთეში ილოცებს მხოლოდ ერთი-ორი პირვნება. ვიცავთ დისტანციას, თითო პიროვნებას შორის მეტრანახევარი-ორმეტრიანი. პირბადე უნდა ჰქონდეს მორწმუნეს და სალოცავი ხალიჩა სახლიდან უნდა წამოიღოს“, - ამბობს მეჩეთის წინამძღვარი.

მისივე განმართებით, ძალაში რჩება შეზღუდვა ხელის ჩამორთმევასა და გადახვევაზე. სალოცავის შესასვლელში კი, მრევლს ხელებისთვის სადეზინფექციო ხსნარი დახვდება.

„ყველაფერი დამოკიდებულია მომავალში მოვლენების განვითარებაზე. ვგულისხმობ, დაავადების გავრცელების ტემპს, თუ იქნება საშიშროება ჩვენ კვლავ დავაწესებთ შეზღუდვებს. თუ იქნება დაავადების გავრცელების სტაბილურად დადებითი ბალანსი, ვილოცებთ, ოღონდ მკაცრი რეგულაციების დაცვით“, - ამბობს იმამი ჯამბულ აბულაძე.

მუსლიმმა თემმა ლოცვის წესებში ცვლილებები მარტის შუა რიცხვებში შეიტანა. 18 მარტიდან კი სრულიად საქართველოს მუსლიმთა სამმართველოს გადაწყვეტილებით, კორონავირუსის პრევენციასთან დაკავშირებით, მეჩეთებში პარასკევისა და ხუთი დროის ჯემაღეთით (კოლექტიური) ლოცვა დროებით შეჩერდა.

[თაკო ფეიქრიშვილი, ადიგენი]