ჯამბულ აბულაძე მეუფე თეოდორეს ბოდიშის მოხდას სთხოვს

ჭელას მეჩეთის წინამძღვრის ჯამბულ აბულაძის განცხადებით, იგი დღეს მოხეში არ ყოფილა, მან ლოცვა ჭელაში, საკუთარ მეჩეთში აღავლინა და მოხეში მიმდინარე მოვლენებთან კავშირი არ აქვს.

„მეუფე რომ ამბობს, ჯამბული ავიდა მოხეში და ის ძაბავს ვითარებასო, ტყუილია, იქ არ ვყოფილვარ, ეს ცილისწამებაა! სადაც გინდათ გადაამოწმეთ. ეგ კაცი არის თაღლითი, მატყუარა, გაიძვერა და პროვოკატორი, ზუსტად ასე დაწერეთ. მას არ აქვს უფლება მაგ პოზიციაზე მუშაობდეს“, – აცხადებს აბულაძე.

ჭელას მეჩეთის წინამძღვარი მეუფე თეოდორეს გავრცელებული ცრუ ინფორმაციისა და ცილისწამებისთვის ბოდიშის მოხდას სთხოვს: „უმაღლესი სასულიერო პირია და ტყუილებს ლაპარაკობს. ეგენი ურევენ დღეს ჩვენ ქვეყანას და რეგიონს“.

შეკითხვაზე, თვითონ როგორ აფასებს მოხეში მუსლიმი თემის გადაწყვეტილებას, აბულაძე გვპასუხობს: „მაგ ფაქტს ვერ შევაფასებ. ეგ ადგილობრივების გადაწყვეტილებაა. არანაირი შეხება მაგ ფაქტთან არ მაქვს. კომისიამ ვერ გადაწყვიტა ვერაფერი და ხალხმა თავად სცადა პრობლემის გადაწყვეტა. მე როგორც კანონმროჩილ ადამიანს, ბევრი შეკითხვა მიჩნდება ამ კომისიის მუშაობაზე“.

შეკთხვაზე, თავად როგორც კანონმორჩილი ადამიანი, როგორ აფასებს იმას, რომ მუსლიმი მრევლი არ დაელოდა კომისიის გადაწყვეტილებას და სადავო შენობაში თვითნებურად შევიდა, გვპასუხობს: „ეგ მათ უნდა ჰკითხოთ. ისინი გაგცემენ პასუხს. მე თუ მეკითხებით, მე დავლოდებოდი კომისიის გადაწყვეტილებას“.

შეგახსენებთ, ახალციხისა და ტაო-კლარჯეთის მიტროპოლიტმა მეუფე თეოდორემ მოხეს სადავო შენობაში მუსლიმების მიერ ლოცვის დაწყებაზე დღეს პრესკონფერენია გამართა. მეუფის განცხადებით, მხარეები შეთანხმდნენ, რომ მოხეში, სადავო შენობაშ ლოცვა არ გაიმართება, თუმცა, დღეს იქ ჯამბულ აბულაძე ავიდა და ლოცვა მაინც ჩაატარა. მეუფემ ადგილობრივ და ცენტრალურ ხელისუფლებას მიმართა, ყველაფერი გააკეთონ, რათა თავიდან იქნას აცილებული ყოველგვარი ძალადობა და დაპირისპირება ადიგენში, სოფელ მოხეში.

ასევე შეგახსენებ, მუსლიმებმა სადავო შენობაში ლოცვა 4 დღის წინ დაიწყეს. დღეს კი სამართალდამცველებმა შენობის კარი აჭედეს. მოხეში რელიგიურ ნიადაგზე კონფლიქტი 2014 წლის 22 ოქტომბერს მოხდა. მას შემდეგ სადავო შენობის საკითხის შესასწავლად რეგლიის სახელმწიფო სააგენტოში კომისია შექმნა, თუმცა მას გადაწყვეტილება ამ დრომდე არ გამოუტანია.

[თამუნა უჩიძე, ადიგენი]