ჭელას მეჩეთში სამხრეთის კედლის მოხატვა დასრულდა [ფოტო]

ადიგენის სოფელ ჭელაში მეჩეთის მოხატვა 2018 წელს დაიწყეს. საქართველოში ოსტატების სიმცირის გამო, კედლებს, თეოლოგების დახმარებით, ადგილობრივი ასლან ჯავახიძე ხატავს.

ჭელას მეჩეთის იმამი ჯამბულ აბულაძე ამბობს, რომ სამხრეთის კედლის, მიჰრაბის მოხატვა მნიშვნელოვანი ნაწილი იყო: "ეს არის კედელი, რომელიც უჩვენებს მიმართულებას ქააბასკენ. მნიშვნელოვანია მისი მოხატულობა. თუმცა არ გვაქვს განსაკუთრებული ელემენტები, რომლიც აუცილებლად უნდა იყოს მოხატულობაში. როგორც ეკლესიაშია საკურთხეველი, ასევეა ჩვენთან მიჰრაბი. კედლის მოხატულობა დასრულდა, თუმცა მეჩეთის მოხატვა გრძელდება".

მისივე თქმით, სალოცავის მოხატვისას, მნიშვნელოვანია, რომ კედლები ძალიან ჭრელი არ იყოს. მათი გადაწყვეტილებით, კედლებზე ყურანის აიათების ქართულ ენაზე დატანაც უნდათ.

"რაც ყველაზე სასიამოვნოა, ჩვენ ვაშენებთ, ვხატავთ ქართველი მუსლიმების ხელით. ჩვენ ვცდილობთ, დავამკვიდროთ ახალი ქართული ისლამური ხელოვნება", - ამბობს ჭელას მეჩეთის იმამი ჯამბულ აბულაძე.







[თაკო ფეიქრიშვილი, ადიგენი]