"ადინაცეტები" ყურადღების ცენტრში მოხვდა

რეგიონებში განსახორციელებელი პროექტების ფონდიდან 2014 წელს ახალციხეში დასაფინანსებელი პროექტების ჩამონათვალში ერთ-ერთი ზარზმელის ქუჩის რეაბილიტაციაა.
ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე ამბობს, რომ პროექტი სამინისტრომ მოიწონა და განსახილველად მთავრობის სხდომაზე გაიტანა. პროექტის დაფინანსების შესახებ განკარგულებას კი თვითმართველობაში რამდენიმე დღეში ელოდებიან.

„თითქმის 100 პროცენტით დარწმუნებული ვარ, რომ აღნიშნული პროექტი დაფინანსდება. სამინისტროდან ოფიციალურ წერილს კვირის ბოლომდე ველოდებით. ამის შემდეგ დაიწყება სამუშაოები“, - ამბობს ბესიკ ბლიაძე.

პირველ ეტაპზე ზარზმელის ქუჩაზე გზისა და საკანალიზაციო სისტემის მოწესრიგება იგეგმება.

„აღნიშნულ ქუჩაზე გზა ბოლომდე დაიგება. კორპუსებთან მისასვლელი გზები მთლიანად მოწესრიგდება და რაც მთავარია გაკეთდება ცენტრალური საკანალიზაციო სისტემა“, - განმარტავს ბლიაძე.

აღნიშნული სამუშაოებისთვის ჯამში 606 312, 59 ლარია გამოყოფილი.

ზარზმელის ქუჩაზე პრობლემა მხოლოდ გზები და საკანალიზაციო სისტემის გაუმართავობა არ არის. დასახლებაში არ არის განათება. მოსახლეობა დახმარებას წლებია ითხოვს, თუმცა, ადგილობრივ ხელისუფლებაში ყოველთვის პასუხობდნენ, რომ აღნიშნული დასახლება მუნიციპალიტეტის ბალანსზე არ არის და შესაბამისად, სხვისი ქონების მოვლა-პატრონობა არ შეუძლიათ. მდგომარეობა 2013 წელს შეიცვალა, პირველ ეტაპზე მუნიციპალიტეტის ბალანსზე მხოლოდ გზა გადავიდა.

„მთავარია მთლიანი ტერიტორიის გადმოცემის პროცესი დაიწყოს. მერე ეტაპობრივად დაიგეგმება სხვა სამუშაოებიც“, - ამბობს ბესიკ ბლიაძე.
როდის დაიწყება მთლიანი ტერიტორიის გადაცემის პროცესი თავდაცვის სამინისტროდან მუნიციპალიტეტის ბალანსზე, ამ ეტაპზე უცნობია. თუმცა, თუ სამინისტროს მოწონებულ პროექტს მთავრობაც მოიწონებს, ათეული წლების შემდეგ ზარზმელის ქუჩაზე, ყოფილ სამხედრო დასახლებაში, გზისა და კანალიზაციის პრობლემა საბოლოოდ მოგვარდება.
ბლიაძის თქმით, აღნიშნულ ქუჩაზე სამუშაოები სავარაუდოდ გაზაფხულიდან დაიწყება.

[მანანა სარაშვილი, ახალციხე]