დაპირისპირება ახალქალაქში – ერთი ახალგაზრდა საავადმყოფოშია გადაყვანილი

საქმე ნასესხებ ფულს ეხებოდა: „ამ ბიჭებს მკოიანების ვალი ჰქონდათ და ამაზე დაიწყო საუბარი. ფიზიკურად დაუპირისპირდნენ ერთმანეთს, საავადმყოფოშიც მოხვდნენ. მგონი ლაპარაკი სულ 20 ლარზე იყო“, - ამბობენ ადგილობრივები.

ახალქალაქის საავადმყოფოში ამბობენ, რომ მათთან დღეს ერთი პირი შეიყვანეს, რომელიც ამბობს, რომ საკუთარ ეზოში წაიქცა.

„ახალგაზრდა ბიჭი მოიყვანეს საავადმყოფოში, ამბობს, რომ ეზოში თავის სახლში წაიქცა. სავარაუდოდ, სახის ძვლის მოტეხილობა აქვს. ჩაუტარდა გამოკვლევა და ჯერ პასუხი არ არის. ამის შედეგ დავადგენთ არის მოტეხილობა თუ არა“, - ამბობს ახალქალაქის საავადმყოფოს დირექტორი ალექსანდრე თოროსიანი.

შინაგან საქმეთა სამინისტროში დაპირისპირების ფაქტს ადასტურებენ. მათი ინფორმაციით, საქმეზე მიმდინარეობს გამოძიება სსკ 126 მუხლის პირველი პრიმა ნაწილის „ბ“ და „გ“ ქვეპუნქტებით, რაც გულისხმობს ძალადობას ჯგუფურად, ორი ან მეტი პირის მიმართ.

"სამხრეთის კარიბჭე" ვითარების გასარკვევად ენზელ მკოიანს დაუკავშირდა, მაგრამ დეპუტატმა ჩვენს სატელეფონო ზარებს არ უპასუხა.

დღევანდელი ჩხუბის ერთ-ერთი მონაწილე 2018 წლის 30 ოქტომბერს, ახალქალაქში მომხდარი პოლიტიკური დაპირისპირებაშიც ფიგურირებს, მაშინ გაერთიანებული ოპოზიცია "ნაციონალური მოძრაობის" შტაბბინასთან ერთმანეთს დეპუტატ ენზელ მკოიანის ახლობლები, მომხრეები და შტაბის აქტივისტები დაუპირისპირდნენ.

[თაკო ფეიქრიშვილი, ახალქალაქი]