‘სანამ გავითიშებოდით, გვირტყამდნენ’ – ჯგუფური ჩხუბი ახალქალაქში

შემთხვევა 18 ივლისს, საღამოს ახალქალაქის სოფელ კოთელიაში მოხდა. ჩხუბში 18-19 წლის თხუთმეტამდე ბიჭი მონაწილეობდა.

„ფეხით მივდიოდით ჩვენ, გზაზე გადასვლისას, მანქანამ დაგვისიგნალა და რაღაც მოგვაძახა. ჩვენც პასუხი გავეცით და ჩხუბიც ამან გამოიწვია. ჯერ ორნი იყვნენ, მერე წავიდნენ და დაახლოებით ათი ადამიანი მოვიდა. შელაპარაკება ხელჩართულ ჩხუბში გადაიზარდა. სანამ გავითიშებოდით, გვირტყამდნენ,“ - გვიყვება ერთ-ერთი დაშავებული.

ორი ნაცემი ახალგაზრდა სასწრაფო-სამედიცინო სამსახურის ბრიგადამ ახალქალაქის რეფერალურ საავადმყოფოში გადაიყვანა. „ერთ-ერთ მათგანს, რომელიც უკვე გავწერეთ, ცხვირის მოტეხოლობა აქვს, ხოლო მეორე, ახალციხის რეფერალურ საავადმყოფოში გადავიყვანეთ, სხეულის მრავლობითი დაჟეჟილობა და ტვინის შერყევა აღენიშნება“, - განმარტავენ საავადმყოფოში.

შემთხვევის ადგილზე იმყოფებოდნენ სამართალდამცველები. შსს-ს ინფორმაციით, გამოძიება დაწყებულია 126-ე პირველი პრიმა მუხლის ბ და გ ქვეპუნქტებით, რაც გულისხმობს ჯგუფურად ჩადენილ ძალადობას ორი ან მეტი პირის მიმართ.

რაც შეეხებათ ბრალდებულებს, შსს-ს ინფორმაციით, დაკავებული ჯერ არავინაა.

[რობი ზარიძე, ახალქალქი]