‘მინისტრის მოადგილის ყველა რეკომენდაცია შევასრულეთ’ – ახალციხის ბაზრის დირექტორი

ახალციხის ბაზრის დირექტორის თქმით, მოვაჭრეებს სადეზინფექციო ხსნარები და ყველა საჭირო აღჭურვილობა დაურიგდათ. დღეს დილიდან კი ის რეკომენდაციებიც შეასრულეს, რომელიც სოფლის მეურნეობის მინისტრის მოადგილემ, სოლომონ პავლიაშვილმა გუშინ გასცა.

„ხორცის და რძის პროდუქტების სექციებში მოვაჭრეებს თეთრი ხალათები აცვიათ და პირბადეები უკეთიათ. ყველა მოვაჭეს აქვს დახლი. ახლა შიდა ტერიტორიაზე ვამზადებთ კიდევ ოთხ დახლს, სადაც მოვაჭრეეები შესვლას შეძლებენ. ადგილზეა პოლიციაც და ყველაფრის კონტროლი მიმდინარეობს“ – გვითხრა ვახტანგ ქართველიშვილმა.

ბაზრის შიდა ტერიტორიაზე ამჟამად მხოლოდ ხორცი იყიდება, გარე პერიმეტრზე კი სოფლის პროდუქტებია განთავსებული. მოვაჭრეები ამბობენ, რომ რეკომენდაციების დაცვა მათთვის რთული არაა, რადგან ყველა საჭირო აღჭურვილობას ბაზრის ადმინისტრაციისგან იღებენ.

„პროდუქტი აღარ გვიფუჭდება, მთავარი ესაა, ყველაფერს დავიცავთ როგორც საჭიროა, მთავარია მყიდველი იყოს. პირბადეები და ხელთათმანები გვაქვს, თუ რამე გვჭირდება მივმართავთ ადმინისტრაციას და ყველაფერი სრულდება როგორც წესია“, – გვითხრა ერთ–ერთმა მოვაჭრემ.

მინისტრის მოადგილის კიდევ ერთი რეკომანდაცია ტერიტორიიდან მიუსაფარი ძაღლების გაყვანა იყო, რაც ბაზრის დირექტორის თქმით, ნაწილობრივ მოგვარდა.

„გუშინ ნაწილი უკვე წაიყვანეს თავშესაფარში, მერია ზრუნავს ამაზე და დანარჩენსაც წაიყვანენ, ტერიტორიაც შემოღობილია და ამ რეკომენდაციასაც შევასრულებთ“.

ბაზრის ტერიტორია ორივე მხრიდან ბეტონის ფილებითაა შემოღობილი და მხოლოდ ერთი შესასვლელი და გასასვლელი აქვს. მოქალაქეებს უტარდებათ თერმოსკრინინგი. ასევე შესასვლელებში განთავსებულია დეზობარიერები.

ახალციხის ბაზრის ადმინისტრაცია 29 მარტს, ტერიტორიაზე საგანგებო მდგომარეობის წესების დარღვევის გამო, 15 000 ლარით დაჯარიმდა.

მას შემდეგ გარკვეული პერიოდი ბაზარი არ ფუნქციონირებდა, აქ მხოლოდ რამდენიმე მაღაზია მუშაობდა. სრული დატვირთვით მუშაობა გუშინ, 5 მაისს განაახლა.







[რობი ზარიძე, ახალციხე]