როგორ გრძნობს თავს ბორჯომელი კოვიდინფიცირებული ახალგაზრდა

ახალდაბელ 30 წლამდე პირს, კორონავირუსი 16 აპრილს დაუდასტურდა. იგი ახლა გორის ჰოსპიტალში მკურნალობს.

„ჩემი შვილი კარგად არის. რაც კლინიკაში გადაიყვანეს, არც ფილტვების ანთება ჰქონია და არც ხველება. თავს კარგად გრძნობს. როცა წაიყვანეს, მაშინაც კარგად იყო“, – გვითხრა მამამ.

მისივე თქმით, მის შვილს მედიკამენტ „პლაქველინით“ ხუთი დღის განმავლობაში მკურნალობდენენ, ამ პერიოდში კი, გართულებები არ ჰქონია და სხვა ტიპის მკურნალობა არ დასჭირვებია.

„როცა კლინიკაში გადაიყვანეს, სისხლის ანალიზი აუღეს, მერე კომპიუტერული ტომოგრაფია, სხვა არაფერი დასჭირვებია, სულ ხუთი აბი ‘პლაქველინი“ დაალევინეს, ახლა უკვე მერვე დღეა არც წამალი და არც გადასხმა არ გაუკეთებიათ“.

კოვიდინფიცირებულ ახალგაზრდას, მონიტორინგის მიზნით, პირველად ტესტს ორშაბათს, 4 მაისს ჩაუტარებენ.

„ანალიზი დღეს უნდა აეღოთ ჩემი შვილისთვის, მაგრამ უთქვამთ განმეორებითი მეორე დღესაც ხომ უნდა ჩაგიტაროთ და რადგან შაბათ–კვირა მოდის, უმჯობესია ორშაბათიდან დავიწყოთო. პირველ ტესტს ორშაბათს გაუკეთებენ, მერე კიდევ სამშაბათს და ალბათ გამოუშვებენ. იქიდან სახლში ჩამოვა და აქ გააგრძელებს კარანტინში ყოფნას“, – ამბობს მამა.

ამ ეტაპზე თავს კარგად გრძნობს ოჯახის ყველა წევრი, ასევე ის ნათესავები, რომელთანაც ინფიცირებულს კონტაქტი ჰქონდა.

„ყველა კარგად ვართ. არანაირი სიმპტომი არ გვქონია ეს დღეებია, ჩემი გოგო, რომელიც ბაკურიანში იყო კარანტინში, მასაც დაუმთავრდა და წავიდა თბილისში სამუშაოდ. ჩვენც, ყველა ოჯახის წევრი და ნათესავი თვითიზოლაციას მოვრჩით. ვიფიქრე, მოვიდოდნენ დამთავრების შემდეგ, ისევ ანალიზის გასაკეთებლად, მაგრამ არავინ მოვიდა საჭიროდ არ ჩათვალეს, რადგან კარგად ვართ“,– ამბობს ინფიცირებულის მამა.

შეგახსენებთ, რომ კორონავირუსის პირველი შემთხვევა ბორჯომშ 16 აპრილს დაფიქსირდა.

[ნუკა სტეფნაძე, ბორჯომი]