ბორჯომელ ახალგაზრდას განმეორებითი ტესტირების დროს COVID-19 არ დაუდასტურდა

ბორჯომელ ახალგაზრდას კორონავირუსზე PCR-ტესტი თბილისის ერთ-ერთ კლინიკაში გაუკეთეს, იგი საზღვარგარეთ გამგზავრებას აპირებდა და გამოკვლევაც ამიტომ ჩაუტარეს.

რადგან პირველმა ტესტმა კორონავირუსზე დადებითი შედეგი აჩვენა, ახალგაზრდა კოვიდცენტრში, ქალაქ გორში გადაიყვანეს. მას განმეორებითი ტესტირება 72 საათის შემდეგ ჩაუტარეს და აღმოჩნდა რომ იგი ინფიცირებული არ არის.

„განმეორებითმა ტესტმა უარყოფითი პასუხი აჩვენა, თავს კარგად ვგრძნობ, ცუდად არც ვყოფილვარ და ხვალ კლინიკას დავტოვებ“,- ამბობს იგი.

ბორჯომის საზოგადოებრივი ჯანდაცვის ცენტრის ხელმძღვანელის, მანანა რატიანი ადასტურებს, რომ პირველადი ტესტირების შედეგი მცდარი აღმოჩნდა.

„პირველად თბილისში აიღო ანალიზი, რომელმაც დადებითი პასუხი აჩვენა და გადაიყვნაეს კლინიკაში. დღეს უკვე 72 საათის გასვლის შემდეგ მისმა განმეორებითმა ტესტმა უარყოფითი პასუხი აჩვენა, ასეთი ფაქტები ხდება. იმდენად მგრძნობიარეა ტესტი, რომ შეიძლება ერთი და ორი თვის წინ დაწყებული პროცესიც კი აჩვენოს, მაგრამ ამ პერიოდში ეს არ არის გადამდები“,- ამბობს მანანა რატიანი და ამატებს, რომ სასურველია ერთი კვირის განმავლობაში აღნიშნული პირი სახლში, თვითიზოლაციაში იმყოფებოდეს.

ახალგაზრდა კლინიკას ხვალ, 17 ოქტომბერს დატოვებს და ბორჯომში დაბრუნდება.

[ნუკა სტეფნაძე]