ორი დღეა ახალციხის გარეუბანში, ჩოლოყაშვილის ქუჩაზე მცხოვრები კეღოშვილების ეზო კრამიტის, ხე-მასალისა და ბლოკების ნატეხებითა მოფენილი.
შაბათს, 23 ივნისს, საღამოს 5 საათზე, მოულოდნელად ამოვარდნილმა ძლიერმა ქარმა, კეღოშვილების კუთვნილ ფერმას სახურავი გადახადა და მშენებარე სახლის მეორე სართული ჩამოანგრია.
”ჩემ მეხსიერებაში ასეთი ამინდი არ მახსოვს, უცებ ისე ჩაბნელდა, ვეღარაფერს ვხედავდით. სულ რაღაც ათი წუთი გაგრძელდა წვიმა, ქარი და სეტყვა, რომ გადაიღო და გამოვედით, დანგრეული იყო ყველაფერი”, - იხსენებს ტარიელ კეღოშვილი.
ადიგენის მუნიციპალიტეტის სოფელ აბასთუმნიდან ახალციხეში საცხოვრებლად კეღოშვილები 15 წლის წინ გადმოვიდნენ. ქალაქის გარეუბანში, ყოფილი ყველ-კარაქის ქარხნის ტერიტორიაზე კეღოშვილების გარდა არავინ ცხოვრობს. საცხოვრებელი სახლი ჯერ არც კეღოშვილებს აქვთ. ისინი ორ სამხედრო ვაგონში აფარებენ თავს. ძლიერმა ქარმა კი სწორედ იმ მშენებარე სახლს მოანგრია მეორე სართული, რომელის დასრულებასაც ოჯახი შემოდგომისთვის ვარაუდობდა.
”სახურავის დადგმას ვაპირებდი უკვე, კოჭები გამზადებული იყო. კედლებიც ჩამოინგრა და ჭერებიც ისე დაიმსხვრა, აღარ გამოდგება”, - ამბობს კეღოშვილი.
მშენებარე სახლის გარდა ძლიერმა ქარმა მთლიანად გადახადა სახურავი კეღოშვილების ფერმასაც, რომელშიც დაახლოებით 40 სული პირუტყვია დაბინავებული.
”ორი შენობაა გვერდიგვერდ, ერთი შედარებით ახალი და მეორე ძველი. ახალ შენობას მოხსნა სახურავი, ”შიფერი” სულ დაამტვრია, კოჭები ისე დაიყარა მეორე სახურავზე, ხელით დალაგებული გეგონება”, - ამბობს ოჯახის უფროსი.
სტიქიამ კეღოშვილების ნათესებიც გაანადგურა. დიასახლისის თქმით, კარტოფილი, ლობიო და კიტრი-პომიდორი აღარ ”გაცოცხლდება”, სიმინდი შედარებით ძლიერი კულტურაა და შესაძლოა ნაყოფი მაინც გაიკეთოს.
კეღოშვილების მდგომარეობის შესახებ ადგილობრივი ხელისუფლებაში იციან. ახალციხის მუნიციპალიტეტის გამგეობას კეღოშვილმა შაბათსვე მიაკითხა.
”მითხრეს, არასამუშაო დღეებია, ახლა ტელევიზია აიყვანე და ორშაბათიდან კომისიას გამოვიშვებთო”, - ამბობს კეღოშვილი და ამატებს, რომ გამგებელს ამ დილითაც მიაკითხა, - ”მითხრეს კომისია შეისწავლის, ასე 20 დღე დაგვაგვიანდებაო. ვუთხარი 20 დღე მტერმა უყურა დანგრეულ შენობებს, რაღაცა დამაკვალიანე, ხომ უნდა გავწმინდო იქურობა მაინც-მეთქი. მერე ვიღაცას გადაურეკა და დაავალა ადით და შეისწავლეთ მდგომარეობაო. ამ წუთებშიც ველოდები კომისიას”.
საცხოვრებელი სახლისა და ფერმისთვის კეღოშვილებს პრო-კრედიტ ბანკიდან 20 000 ლარი სესხი აქვთ აღებული. ყოველთვიურ შესატანს რძის ჩაბარებით მიღებული თანხით იხდიან. სახსრები, რომ მშენებლობა განაახლონ, კეღოშვილებს აღარ აქვთ.
”ჩემი მარტივი გაანგარიშებით, 10 000 ლარის ზარალია. ამ სახლის აშენება, თავისი მასალითა და ყველაფრით, უკვე მიზის 5 000 ლარი, ამავე ოდენობის ზარალია ფერმაზეც”, - ამბობს კეღოშვილი.
მართალია, ადგილობრივ ხელისუფლებაში კეღოშვილების შესახებ ინფორმირებული არიან, თუმცა, ჯერ არც ზარალის შემსწავლელი კომისია შექმნილა და არც ისაა გარკვეული, დაეხმარებიან თუ არა დაზარალებულებს.
”განცხადება აქვს დაწერილი და ვნახოთ”, - ამბობს ახალციხის მუნიციპალიტეტის გამგებელი გელა დემეტრაძე.
ამ ეტაპზე არც ისაა ცნობილი, გამოიყოფა თუ არა თანხა ადგილობრივი ბიუჯეტის სარეზერვო ფონდიდან.
”ჯერ უნდა გაირკვეს რამდენად არის დახმარების საჭიროება”, - ამბობს გამგებელი.
ზარალის შემსწავლელი კომისიის მოლოდინში, ოჯახის უფროსი ეზოს ბეტონის, კრამიტისა და ხე-მასალის ნარჩენებისგან ჯერ ვერ ასუფთავებს. ადგილობრივი ხელისუფლების დახმარება ოჯახის ერთადერთი იმედია, ადგილობრივ ხელისუფლებაში კი ჯერ კომისიაც არ შექმნილა. გამგებელი ვერც იმას აკონკრეტებს, როდის შეიქმნება კომისია, რომელიც სტიქიით მიყენებულ ზარალს დაითვლის.
[ნინო ნარიმანიშვილი, ახალციხე]