ძლიერმა ქარმა ასპინძაში შენობებს სახურავი გადახადა

ადგილობრივების განმარტებით, ძლიერ ქარი საღამოს, დაახლოებით 21:00 საათისთვის დაიწყო და გვიან ღამემდე გაგრძელდა. ქარმა საცხოვრებელ სახლებს სახურავები ასპინძის მუნიციპალიტეტის რამდენიმე სოფელში გადახადა. დაზიანებული აქვს სახურავები სავაჭრო ობიექტებსაც. დაბაში კი სახურავი ნაწილობრივ გადახადა სტადიონზე, ტრენაჟორების დარბაზს. გათიშული იყო ელექტროენერგიაც.

ასპინძის მუნიციპალიტეტის გამგეობაში განმარტავენ, რომ საცხოვრებელი სახლების სახურავებს გამგეობა შეაკეთებს, კერძო ობიექტებზე კი ზრუნვა მეპატრონეებს მოუწევთ.

"იმ დღესვე მოვახდინეთ რეაგირება, გადავიღეთ ფოტოები. დაზიანებული საცხოვრებელი სახლები აწყვიტაში, ტოლოშსა და თმოგვშია, მცირე რაოდენობის ზარალია მიყენებული", - ამბობს ასპინძის მუნიციპალიტეტის გამგებლის მოადგილე ალექსანდრე პაპაშვილი.

ასპინძის მუნიციპალიტეტის გამგეობაში დახმარების თხოვნით წერილი უკვე გააგზავნა ხორცკომბინატ "მესხეთი პროდაქტის" წარმომადგენელმა.

"50-60 კვადრატია გადახდილი, სახურავით ვერ დაგვეხმარებიან, მაგრამ თქვეს შუამდგომლობას გაგიწევთ, რომ ტყიდან მასალის გამოტანა შეძლოთო, ამაზეც მადლობელი ვართ", - ამბობს ხორცკომბინატ "მესხეთი პროდაქტის" წარმომადგენელი ტრისტან ციხელაშვილი.

[თინათინ ზაზაძე, ასპინძა]