მზად ვართ შევცვალოთ პროტოკოლი და 7 დღეში ერთხელ გავუკეთოთ ტესტირება – ტიკარაძე მედპერსონალზე

პირველი საუნივერსიტეტო კლინიკის სამედიცინო პერსონალი, ფოტო: პარლამენტის ეროვნული ბიბლიოთეკა

„როგორც იცით მედპერსონალი არის რისკ–ჯგუფი, დღემდე პროტოკოლით მათი შემოწმება ორკვირაში ერთხელ ხდება, თუმცა შეიძლება დადგეს განხილვის საკითხად და შეიცვალოს, თუ ეს იქნება თანხვედრაში მსოფლიო ჯანდაცვის ორგანიზაციის პროტოკოლთან. ჩვენ მზად ვართ შევცვალოთ ეს პროტოკოლი და გადავიყვანოთ ექიმები ყოველ შვიდ დღეზე ტესტირების. ეს არის დღეს დღეობით განხილვის საგანი გადაწყვეტილება მიღებული არ არის“, – განაცხადა ეკატერინე ტიკარაძემ.

როგორც, ჯანდაცვის მინისტრმა აღნიშნა, ექიმებისთვის ყველა სახის პროტოკოლი ცნობილია და მათ უტარდებათ ტრენინგები. მისი თქმით, საქართველოში ექიმებისთვის პირადი დაცვის საშუალებები საკმარისია და ამ დრომდე პრობლემა მათ არ შექმინიათ.

საქართველოში დღეის მონაცემებით მედპერსონალის ინფიცირების 72 შემთხვევაა გამოვლენილი.

28 აპრილს გამართულ ბრიფინგზე ტიკარაძემ განაცხადა, რომ ექიმების დაინფიცირება არ ხდება სამუშაო ადგილებზე: "მნიშვნელოვანი ფაქტი არის ის, რომ უმრავლესი შემთხვევა არ მომხდარა სამუშაო ადგილზე და ეს არის აღსანიშნავი. ჩვენ ექიმებს უტარდებათ ისეთი ტრენინგები, რომელიც არის პირადი დაცვის საშუალებების სწორ გამოყენებასთან დაკავშირებით და ჩვენ კიდევ უფრო ვამკაცრებთ ღონისძიებებს ამასთან მიმართებით".

[ნუკა სტეფნაძე]