ახალციხის და ბორჯომის ბაზრები ისევ დაკეტილია

„ამ ეტაპზე იხსნება მხოლოდ ღია ტიპის ბაზრები. რაც შეეხება ბორჯომს და ახალციხეს ორივე არის დახურული სივრცის ბაზარი, ამიტომ ვერ გაიხსნება“,– განაცხადა სამცხე–ჯავახეთის სახელმწიფო რწმუნებულის აპარატის ხელმძღვანელმა, გიორგი მიქელაძემ.

მისი თქმით, ამ ეტაპზე რეგიონში არსებული ბაზრები, სურსათის ეროვნული სააგენტოს მიერ მითითებული სტანდარტების დაკმაყოფილებაზე მუშაობენ.

„როდესაც ბაზრების გახსნის ახალ ეტაპზე გადავალთ, იმედია დაკმაყოფილებული იქნება ყველა სტანდარტი და ფუნქციონირებას შეძლებენ“, – განმარტა მიქელაძემ.

საქართველოს მთავრობის გადაწყვეტილებით, დღეიდან კორონავირუსის პანდემიის გამო დაწესებული შეზღუდვების ეტაპობრივად მოხსნა იწყება. 27 აპრილიდან ღია ტიპის აგრარული ბაზრები გაიხსნა, დაშვებულია ონლაინ ვაჭრობა და მსუბუქი მანქანებით გადაადგილება.

ახალციხის ბაზარი 12 აპრილს დაიკეტა, ბორჯომში კი რვა აპრილს.

16 აპრილს სამცხე–ჯავახეთის მხარის რწმუნებულმა, ბესიკ ამირანაშვილმა განაცხადა, რომ ქვეყანაში კორონავირუსის შემთხვევების მატების გამო, ახალციხის და ბორჯომის ბაზრები არ გაიხსნება.



[ნუკა სტეფნაძე, ახალციხე]