ცემში ოთხსულიან ოჯახს სახლი მთლიანად დაეწვა [ფოტო]

სოფელ ცემში ორსართულიან სახლს ხანძარი დღეს, 20 აპრილს გაუჩნდა. შემთხვევის შედეგად არავინ დაშავებულა, როგორც საგანგები სიტუაცების მართვის სამსახურში აცხადებენ დამწვარია 300 კვ–მდე ფართი.

სოფლის მაჟორიტარი დეპუტატის, მამუკა ლურსმანაშვილის განმარტებით, ხანძარი სავარაუდოდ ჭერში გაჩნდა.

„სკვამურში გაჩნდა ხანძარი. ოჯახის წევრებმა დაინახეს ავიდნენ და ჩააქრეს, მაგრამ როგორც ჩანს სრულად ვერ მოახერხეს. ისევ გაღვივდა და ხელახლა გაჩნდა ხანძარი. ხვალ ექსპერტიზა დაადგენს ზუსტად გამომწვევ მიზეზს. თითქმის სულ დამწვარია სახლი. რამდენიმე ნივთის გადარჩენა შეძლეს მეზობლების დახმარებით“,– გვითხრა მამუკა ლურსმანაშვილმა.

მისი განმარტებით, ოჯახი სოციალურად დაუცველია: „ოჯახში ოთხი წევრი ცხოვრობს. თავისი შრომით აქვთ აშენებული სახლი, რომელიც ფაქტობრივად სულ განადგურდა, ამაღამ მეზობელთან გაათევენ, ხვალ კი დავეხმარებით“.

შემთხვევის ადგილზე იმყოფებოდნენ ბორჯომის მერი და მისი მოადგილე.

ბუბა ბერიძე, ამბობს პირველ რიგში დაზარალებულ ოჯახს ქირით გადაიყვანენ, შემდეგ გადაწყდება როგორ დაეხმარებიან.

„ფაქტობრივად ღია ცის ქვეშ დარჩნენ, ჯერ ქირით გავიყვანთ, შემდეგ ფინანსურადაც დავეხმარებით“,– განაცხადა მერის მოადგილემ.

სოფელ ცემში ხანძარი საღამოს დაახლოებით 20:30 საათზე გაჩნდა.



[ნუკა სტეფნაძე, ბორჯომი]