ცემში ხანძრისგან დაზარალებულ ოჯახს ბორჯომის მერია დაეხმარება

სოფელ ცემში სოციალურად დაუცველ ოჯახს, ორსართულიანი სახლი 20 აპრილს დაეწვა.

მისი აღდგენისთვის ოთხსულიან ოჯახს ბორჯომის მერია და სამცხე-ჯავახეთის გუბერნია დაეხმარება: „ბორჯომის მერია 21 000 ლარით დაეხმარება, სამცხე-ჯავხეთის გუბერნიისა და მუნიციპალიტეტის ერთობლივი ძალებით, სამერქანე მასალასაც მივცემთ, იატაკისთვის, სახურავისთვის და რისთვისაც დასჭირდებათ“, - ამბობს ბორჯომის მერის მოვალეობის შემსრულებელი დავით ზაალიშვილი.

მისივე თქმით, თვითმმართველობის მძიმე ტექნიკა უზრუნველყოფს დამწვარი ნარჩენების გატანას და გზის მოსწორებასაც: „მუნიციპალიტეტი დაეხმარება მძიმე ტექნიკით, რომ დამწვარი მასალა გადაიყაროს, მისასვლელი გზაა გაფუჭებული ტექნიკა რომ მუშაობდა იქ და ტალახს მოუჭრის მძიმე ტექნიკა, ქვიშა-ღორღი, რაც იქნება საჭირო იმასაც მივუტანთ, რომ პრობლემა არ ჰქონდეს“.

ცემში ხანძარი, 20 აპრილს, საღამოს დაახლოებით 20:30 საათზე გაჩნდა.

[თაკო ფეიქრიშვილი, ბორჯომი]