ახალციხის სასამართლომ ასპინძის სამი სოფლის რწმუნებულის საჩივარი არ დააკმაყოფილა

ასპინძის მუნიციპალიტეტის გამგეობის ყოფილი რწმუნებულები გივი ჩოხელი, ტარიელ აფციაური და ჯემალ იაკობიძე ამბობენ, რომ 2 აგვისტოს, დაკავებული თანამდებობებიდან ზეწოლის შედეგად, მუნიციპალიტეტის გამგეობაში ჩატარებული თათბირის შემდეგ გაათავისუფლეს.

გათავისუფლებიდან დაახლოებით ერთ კვირაში მათ სამსახურში აღდგენის მოთხოვნით ახალციხის რაიონულ სასამართლოში საჩივარი შეიტანეს.
ყოფილი რწმუნებულები გამგეობის ადმინისტრაციული აქტების ბათილად ცნობასა და სამსახურში აღდგენას ითხოვდნენ. ამ საკითხთან დაკავშირებით სამი სასამართლო პროცესი გაიმართა. საბოლოო გადაწყვეტილება მოსამართლე გიორგი ლონდარიძემ დღეს, 7 ნოემბერს გამართულ სასამართლო პროცესზე მიიღო.

სასამართლო პროცესს მხოლოდ ერთი მოსარჩელე, სოფელ იდუმალის ტერიტორიული ორგანოს ყოფილი რწმუნებული ტარიელ აფციაური დაესწრო. აფციაურის განმარტებით, მოსამართლემ უკანონო გადაწყვეტილება მიიღო: „გამგეობას არ ჰქონდა საკრებულოს გადაწყვეტილება ჩვენი გათავისუფლების შესახებ, რაც აუცილებელი იყო. მოსამართლემ უკანონო გადაწყვეტილება გამოიტანა, მაგრამ გასაჩივრებას აზრი არ აქვს, მაინც იგივე პასუხს მივიღებთ“.

სასამართლო პროცესს არ დასწრებია მოსარჩელე მხარის ადვოკატი საიას გორის ოფისის ხელმძღვანელი ქეთევან ბებიაშვილიც:„გადაწყვეტილების გამოცხადების დროს დასწრება სავალდებულო არ არის. ჩვენ დავუკავშირდით ჩვენი დაცვის ქვეშ მყოფთ და თუ გადაწყვეტენ გასაჩივრებას, აუცილებლად დავეხმარებით. ამჟამად გადაწყვეტილება მიღებული არ აქვთ“.

ასპინძის მუნიციპალიტეტის გამგებლის მოადგილე, ალექსანდრე პაპაშვილი ამბობს, რომ მოსამართლემ გადაწყვეტილება ობიექტურად გამოიტანა და ყოფილ რწმუნებულებზე ზეწოლას ადგილი არ ჰქონია. მისი თქმით, 2 აგვისტოს თათბირს წინ უსწრებდა სოფლებში ჩატარებული შეხვედრები.

„მოსახლეობა უკმაყოფილებას გამოთქვამდა, რომ თუ შეიცვალა ხელისუფლება, უნდა შეიცვალონ რწმუნებულებიც. ცხადია, ჩვენ ასე არ ვფიქრობდით და რადგან მათ რწმუნებულებთან პრეტენზიები ჰქონდათ, შევთავაზეთ, ჩაეტარებინათ კრება, გამოთქვათ აზრი, წარმოედგინათ რამდენიმე კანდიდატურა და თუ რწმუნებულებიც დაგვთანხმდებოდნენ, შევცვლიდით გამოსაცდელი ვადით. ეს ყოფილმა რწმუნებულებმა აღიქვეს ფსიქოლოგიურ ზეწოლად და იჩივლეს“, - ამბობს ალექსანდრე პაპაშვილი.

შეგახსენებთ, რომ ასპინძაში 21 რწმუნებულიდან პოსტი14-მა რწმუნებულმა დატოვა. სამსახურიდან გათავისუფლება მხოლოდ სამმა, იდუმალის, რუსთავისა და ოშორის რწმუნებულმა გაასაჩივრა.

[თინათინ ზაზაძე, ახალციხე]