ბორჯომის პრესსამსახურის ყოფილმა თანამშრომელმა სასამართლო დავა წააგო

სასამართლო დავა იმ საქმეზე, რომელიც პრესსამსახურის ყოფილმა თანამშრომელმა ბორჯომის გამგეობის წინააღმდეგ შეიტანა, დასრულდა. მოსამართლე გოჩა ჯეირანაშვილმა გადაწყვეტილება დღეს, 29 მაისს გამოაცხადა. პრესსამსახურის ყოფილმა თანამშრომელმა ნატა კოპაძემ სასამართლო დავა წააგო.

„მოსამართლემ გააუქმა ჩვენი მოთხოვნა, ბათილობა“, – აცხადებს ნატა კოპაძის ადვოკატი ეკა აბაშიძე და ამატებს, რომ როგორც ჩანს, მოსამართლემ ჩათვალა რომ კვალიფიკაცია არ იყო საჭირო: „დღეს ამის შესახებ არ განუცხადებია, უბრალოდ, ეს ფრაზა გააჟღერა ერთ–ერთ პროცესზე. ჯერ ველოდები გადაწყვეტილების ჩაბარებას, გადაწყვეტილებაში რას ჩაწერს, იმის მიხედვით ვიფიქრებ“.

ამ ეტაპზე უცნობია გაასაჩივრებს თუ არა მოსარჩელე მხარე სასამართლოს გადაწყვეტილებას. ადვოკატი ამბობს, რომ ჯერ ნატა კოპაძესთან კონსულტაცია უნდა გაიაროს.

ნატა კოპაძე გადაწყვეტილების გამოცხადებას არ დასწრებია. "სამხრეთის კარიბჭესთან" სატელეფონო საუბარში, იგი აცხადებს, რომ დაახლოებით მსგავს გადაწყვეტილებას ელოდა: "როგორც ჩანს, ადგილობრივი სასამართლოები განიცდიან ზეწოლას. აუცილებლად გავასაჩივრებ სააპელაციო სასამართლოში".

შეგახსენებთ, ბორჯომის მუნიციპალიტეტის გამგეობის პრესსამსახურის ყოფილმა თანამშრომელმა ნატა კოპაძემ ახალციხის რაიონულ სასამართლოში ადმინისტრაციული სარჩელი მიმდინარე წლის 29 იანვარს შეიტანა. ნატა კოპაძე ბორჯომის მუნიციპალიტეტის გამგეობის 2015 წლის 5 იანვრის (N2პ–9) ბრძანების ბათილად ცნობას და სასამართლო წესით თანამდებობაზე აღდგენას ითხოვდა. კოპაძეს ბორჯომის მუნიციპალიტეტის გამგეობაში საჯარო მოხელეთა შესარჩევი კონკურსის ჩატარების შემდეგ დაკავებულ პოზიციაზე დასაქმებაზე უარი უთხრეს. მას აღნიშნული თანამდებობა 2013 წლის 4 ივნისიდან ეკავა.

[ნინო ნარიმანიშვილი, ახალციხე]