'ერთსულოვნება' ადიგენის 'ოცნების' შტაბის ხელმძღვანელს ბოდიშს უხდის

24 სექტემბერს არასამთავრობო ორგანიზაციამ „ერთსულოვნება სამართლიანობისკენ“ ბრიფინგი გამართა, სადაც „ქართული ოცნების“ ადიგენის ყოფილი შტაბის წევრები საპროტესტო აქციის გამართვით იმუქრებოდნენ. ადიგენის „ოცნების“შტაბის ხელმძღვანელებად ავთო კაჭკაჭიშვილისა და ლევან ლობჯანიძის დანიშვნას ის ადამიანები აპროტესტებდნენ, რომლებიც 2012 წლის საპარლამენტო არჩევნების დროს ადიგენის რაიონულ ორგანიზაციაში განსაკუთრებით აქტიურობდნენ.

როგორც 24 სექტემბერს გამართულ ბრიფინგზე ადიგენის მოსახლეობა ამბობდა, „ოცნების“ ხელმძღვანელებად ის ადამიანები დაინიშნენ, რომლებიც „ნაციონალურ მოძრაობასთან“ და ხე-ტყის უკანონო ჭრასთან იყვნენ კავშირში.

„დაახლოებით თვენახევრის წინ, ადიგენის, კერძოდ სოფელ წახანის მოსახლეობამ განცხადებით მოგვმართა, იმის თაობაზე, რომ ოცნების რიგებში მათთვის არასასურველი კანდიდატურა შევიდა. განცხადების შემოსვლის შემდგომ ბრიფინგი გავმართეთ, სადაც ლევან ლობჯანიძის სახელი და გვარი გაჟღერდა. თითქოს მას ხე-ტყის ჭრასთან და ნაციონალურ მოძრაობასთან ჰქონდა კავშირი“, - ამბობს არასამთავრობო ორგანიზაცია „ერთსულოვნება სამართლიანობისკენ“ ხელმძღვანელი ქეთევან ხმალაძე და ამატებს, რომ უშუალოდ მათი ორგანიზაციისგან ლევან ლობჯანიძის სახელი არ გაჟღერებულა და ეს სახელი და გვარი ადიგენის მოსახლეობამ ახსენა.

მას შემდეგ, კი რაც ლევან ლობჯანიძემ აღნიშნულ არასამთავრობო ორგანიზაციას მიმართა, რომ იგი არანაირ კავშირში არ იყო არც „ნაციონალურ მოძრაობასთან“ და არც ხე-ტყის ჭრასთან, ორგანიზაციამ ადიგენის მუნიციპალიტეტში კვლევა ჩაატარა.

„გარკვეულწილად ჩვენგანაც გამოიწვია ამ სახელის და გვარის გაჟღერებამ დაინტერესება. ვითომდა ლევან ლობჯანიძე იყო „ნაციონალურ მოძრაობასთან“ უშუალო კონტაქტში, პარალელურ რეჟიმში იყო „ოცნების“ შტაბის ხელმძღვანელი, ასევე შეკრული იყო ლევან თუმანიშვილთან და კავშირში იყო ხე-ტყის უკანონო ჭრასთან. მაგრამ როგორც ჩვენ გავარკვიეთ, არც ერთი და არც მეორე ინფორმაცია სიმართლეს არ შეესაბამებოდა. არც ავთო კაჭკაჭიშვილზე აღმოჩნდა, რომ მას რაიმე კავშირი ჰქონდა „ნაციონალურ მოძრაობასთან“, - ამბობს „ერთსულოვნება სამართლიანობისკენ“ ლიდერი გენადი ენდელაძე.

მისივე თქმით, ის პირადად შეხვდა სოფელ წახნის მოსახლეობას და ვითარება აუხსნა.

„გაირკვა, რომ ეს ასე არაა, დავუმტკიცე ყველაფერი და ისინიც დარჩნენ კმაყოფილები“,- ამბობს გენადი ენდელაძე.

[თამარ თოთაძე, ახალციხე]