'ერთსულოვნება' ახალციხის მერობის ჯერ არდასახელებული კანდიდატების რეიტინგებს ადგენს

ორგანიზაციის მიერ შედგენილ სიაში მერობის კანდიდატებად გვხვდებიან: გიორგი კოპაძე, გელა დემეტრაძე, ოლეგ სანდროშვილი, გოჩა ათოშვილი, თამარ გოგოლაძე, ჯიმშერ გოგოლაური, გენადი ენდელაძე და ქეთევან ხმალაძე. ამათგან, ენდელაძე და ხმალაძე, ორგანიზაციის წევრები არიან, ქეთევან ხმალაძე ორგანიზაციის თავმჯდომარეა, გენადი ენდელაძე კი ორგანიზაციის ერთ-ერთი ლიდერი.

ქეთევან ხმალაძე განმარტავს, რომ რესპონდენტებს თავადაც შეუძლიათ მერობის კანდიდატი დაასახელონ: „არ არის აუცილებელი, რომ მერობის კანდიდატი იყოს კონკრეტული პირი, რომელიც დარეგისტრირდება მომავალში მერობის კანდიდატად. ავირჩევთ პირობითად ცნობად სახეებს და გამოვიკვლევთ“.

„ერთსულოვნება სამართლიანობისკენ“ კვლევას დაახლოებით ორი კვირის განმავლობაში ჩაატარებს. რესპონდენტების ანონიმურობა დაცული იქნება.

„ქალაქის მასშტაბით გამოკითხვას ათამდე ადამიანი ჩაატარებს, რეგიონის მასშტაბით კი 20-30 ადამიანი. დაახლოებით გვეცოდინება, წინასაარჩევნოდ, ვის როგორი რეიტინგი აქვს და რა შანსები აქვთ არჩევნებზე“, - ამბობს ქეთევან ხმალაძე.

პარალელურად, „ერთსულოვნება“ კიდევ ერთ კვლევას ჩაატარებს. ამ კვლევაში რესპონდენტები სამცხე-ჯავახეთის გუბერნატორის, აკაკი მაჭუტაძის მუშაობას შეაფასებენ.

[თამარ თოთაძე, ახალციხე]