„ერთსულოვნება“ მერობის სავარაუდო კანდიდატების რეიტინგებს აქვეყნებს

„ერთსულოვნებამ“ 985 ადამიანი ანონიმურად გამოკითხა. რეიტინგები ასეთია: გიორგი კოპაძე 30%, გელა დემეტრაძე 15,5 %, ოლეგ სანდროშვილი 0,1 %, გოჩა ათოშვილი 2,5 %, თამარ გოგოლაძე 3,4 %, ჯიმშერ გოგოლაური 3,1 %, გენადი ენდელაძე 7,2 %, ქეთევან ხმალაძე 8%. გამოკითხულთა 24,4 %-მა პოზიცია არ დააფიქსირა.

„ვვარაუდობ, რომ ის ადამიანები, რომლებიც პოზიციას არ აფიქსირებენ, მხარს „ნაციონალების“ კანდიდატს, გელა დემეტრაძეს დაუჭრენ. პირი, რომელიც ფიქრობს რომ მმართველი გუნდის კანდიდატს უნდა დაუჭიროს მხარი, თავის არჩევანს ყოველთვის ღიად აფიქსირებს“, - ამბობს „ერთსულოვნება სამართლიანობისკენ“ თავმჯდომარე ქეთევან ხმალაძე.

იგი საკუთარ რეიტინგს უკვე დასახელბულ „ქართული ოცნების“ კანდიდატს გიორგი კოპაძესა და „ნაციონალური მოძრაობის“ კანდიდატს გელა დემეტრაძეს ადარებს და ამბობს, რომ მიღებული შედეგით კმაყოფილია, რადგან კოპაძეც და დემეტრაძეც ცნობადი სახხეები არიან, თავად კი ახალციხეში ბოლო ორი წელია რაც საქმიანობს: „ამიტომ, მადლობა ნდობისთვის მოსახლეობას“.

„ერთსულოვნება“ მერობის სავარაუდო კანდიდატრებთან ერთად სამცხე-ჯხავახეთის გუბერნატორის აკაკი მაჭუტაძის მუშაობის შეფასებითაც დაინტერესდა.

„მაჭუტაძემ გამოკითხულთა შორის 662 დადებითი პასუხი დააგროვა. უარყოფითად განწყობილი მოქალაქეების რაოდენობა მხოლოდ 4-ია, დანარჩენი კი არ იცნობს“, - გვიხსნის ხმალაძე.

კითხვაზე, რატომ დაინტერესდა „ერთსულოვნება“ ჯერ არ დასახელებული კანდიდატების რეიტინგებით, მაშინ როცა კვლევისთვის გათვალისწინებული რესურსის გამოყენება რეალური კანდიდატების რეიტინგის დადგენაში შეიძლებოდა, გვპასუხობს: „ამ კვლევის მიზანი იყო, გვეჩვენებინა, თუ რამდენად რეიტინგულები იყვნენ ცნობადი სახეები მუნიციპალიტეტში. კვლევა ოფიციალურად წარდგენილ კანდიდატებზეც ჩატარდება“.

[თამუნა უჩიძე, ახალციხე]