ახალციხის სკოლების მდგომარეობას განათლების სამინისტრო იკვლევს

ახალციხის მუნიციპალიტეტის საჯარო სკოლების მდგომარეობის შესწავლა საქართველოს განათლებისა და მეცნიერების სამინისტრომ დაიწყო.

საქართველოს განათლებისა და მეცნიერების სამინისტროს წარმომადგენლებმა ახალციხის მუნიციპალიტეტის მაჟორიტარ დეპუტატთან ვაჟა ჩიტაშვილთან ერთად, მუნიციპალიტეტის არაერთი სკოლა დაათვალიერეს.

ვაჟა ჩიტაშვილი ამბობს, რომ განსაკუთრებით მძიმე მდგომარეობა სოფელ ფერსის საჯარო სკოლაშია: ’ივლისის თვეში, სეტყვის დროს, სახურავი დაზიანდა, ფაქტობრივად დაცხრილულია, სურათებიც გადავიღეთ. შენობაში მაღლა რომ აიხედო, ცა გამოჩნდება. დანარჩენი სკოლები მეტ-ნაკლებად რაღაცას გავს. წყალი არ ჩამოდის და ფანჯრებიც შეცვლილია.

მისივე თქმით, პირველ ეტაპზე სკოლებში პირველადი სამუშაოები ჩატარდება: ’უნდა მოხდეს შეფუთვა, გამოიცვალოს სახურავი, კარ-ფანჯარა, გაკეთდეს გათბობა და თუ სადმე კიბის უჯრედია დაზიანებული. ვერ ვიტყვი, რომ აბსოლუტურად ყველა სოფელში ვიყავით, მაგრამ ინფორმაცია გვაქვს. ხარჯებს დათვლიან და განსაზღვრავენ სადამდე მივალთ’.

[თამარ თოთაძე, ახალციხე]