აღდგომის ღამისთევა ამაღლების ტაძარში [Video]

მთავარი → SK TV » ვიდეო 12.04.2015

12 აპრილს მართლმადიდებელი ეკლესია აღდგომის ბრწყინვალე დღესასწაულს აღნიშნავს. ახალციხის მაცხოვრის ამაღლების სახელობის ტაძარში სადღესასწაულო მსახურება 11 აპრილს, 23:00 საათზე დაიწყო. ღამისთევის მსახურება ტაძრის წინამძღვარმა არქიმანდრიტმა დავითმა აღავლინა.

მწუხრის ლოცვის შემდეგ, ეკლესიაში საქართველოს კათოლიკოს პატრიარქის 2015 წლის სააღდგომო ეპისტოლე წაიკითხეს. ამის შემდეგ კი ტაძრის გარშემო ლიტანიობა, ლოცვითი მსვლელობა გაიმართა, სასულიერო პირებმა, ტაძრის მსახურებმა და მრევლმა ხატებით, ჯვრებითა და ანთებული სანთლებით საგალობელი იგალობეს.

წვიმისა და თოვლის მიუხედავად, მაცხოვრის ამაღლების სახელობის ტაძარი ღვთისმსახურების დაწყებამდე შეივსო, მომლოცველთა ნაწილი სააღდგომო ლიტურგიას გარედან ადევნებდა თვალს.

ამაღლების ტაძარში სადღესასწაულო მსახურება გამთენიამდე, 04:00 საათამდე გაგრძელდა. ლიტურგიის შემდეგ მომლოცველებს სააღდგომო კვერცხი და ტკბილეული დაურიგეს. სააღდგომო მარხვა დასრულდა, დღეიდან ბრწყინვალე შვიდეული, მსგეფსი დაიწყო და მორწმუნეებს ყოველგვარი საკვების მიღება შეუძლიათ.

[ნინო ნარიმანიშვილი, თინათინ ზაზაძე,ახალციხე]