აღდგომის მსახურების დეტალები ხვალ გახდება ცნობილი - საპატრიარქო

„სააღდგომო ლიტურგიის შესახებ დაწვრილებით ხვალ ვიტყვით, თუმცა ერთი რამ შეიძლება ითქვას, რომ მსახურება ჩატარდება, დეტალებია შესათანხმებელი და დღეს ნაჩქარევი იქნება, რომ ვარაუდი გამოვთქვა“,- განაცხადა ანდრია ჯაღმაიძემ.

მისივე თქმით, საუბარი იმის შესახებ, რომ ტაძრებში წირვა „კომენდანტის საათის“ გათვლისწინებით, 21:00 საათამდე აღევლინოს, არ ყოფილა.

„ასეთი მსჯელობა არ ყოფილა, რომ 21:00 საათამდე ჩატარდეს ლიტურგია. ზოგიერთ ტაძარს აქვს შესაძლებლობა, რომ ორჯერ შეასრულოს მსახურება. ორი ტრაპეზი, სადაც არის შესაძლებლია, რომ ღამის მსახურება ერთ ტრაპეზზე შესრულდეს, მეორე ტრაპეზზე დღის. ვისაც არ აქვს ორი ტრაპეზი, მან ჩვეულებრივ დროს უნდა იმსახუროს“, - განაცხადა პრესსპიკერმა.

კითხვაზე, დაირღვევა თუ არა კანონი, თუკი წირვა „კომენდანტის საათის“ დროს აღევლინება, პრესსპიკერმა უპასუხა: „ვნახოთ რა პოზიცია იქნება სახელმწიფოს. საბოლოო ჯამში, ჩვენი მოწოდება იყო, რომ კანონი არ უნდა დავარღვიოთ. დავაზუსტებთ, როგორ გავაკეთოთ ისე, რომ კანონი არ დაირღვეს“.

[თაკო ფეიქრიშვილი, ახალციხე]