კათოლიკე ეკლესიაში სააღდგომო ღამისთევის წირვა მრევლის გარეშე აღევლინა

კათოლიკე ეკელსია აღდგომის დღესასწაულს 12 აპრილს აღნიშნავს. დღეს, 11 აპრილს კი, მრევლის დაუსწრებლად, ტაძრებში სააღდგომო ღამისთევის წირვა აღევლინა.

სასულიერო პირებმა კავკასიის ლათინ კათოლიკეთა სამოციქულო ადმინისტრატორის, ეპისკოპოს ჯუზეპე პაზოტოს დეკრეტში გათვალისწინებული მითითებების მიხედვით, წირვა 21:00 საათამდე დაასრულეს.

მსახურება თითქმის ცარიელ ტაძრებში შესრულდა, დეკრეტის მიხედვით, მასზე დასწრება მხოლოდ შვიდ ადამიანს შეეძლო:

„ყოველმა წინამძღვარმა, საკომენდანტო საათის გათვალისწინებით, (მის დაურღვევლად) აღასრულოს მსახურება თავის ეკლესიაში. ყოველგვარი გამეორების გარეშე. მსახურების ღირსების შესანარჩუნებლად, მწირველი მღვდლის გვერდით შეიძლება იყოს მაქსიმუმ: ერთი დიაკონი, ერთი მინისტრანტი, ერთი წამკითხველი, ორი მგალობელი და ერთი ორღანისტი (სულ 7 პირი)“, - ვკითხულობთ დეკრეტში.

მორწუნეებს საშუალება ჰქონდათ, თბილისის საკათედრო ტაძარში აღვლენილი წირვისთვის თვალი საზოგადოებრივი მაუწყებლის პირდაპირი ეთერის საშუალებით ედევნებინათ. აქ საპასექო ღამისთევის მსახურება ეკლესიის ეპისკოპოსმა აღავლინა.

ხვალ, 12 აპრილს, აღდგომის დღესასწაულზე კათოლიკური ტაძრები პირადი ლოცვისთვის გაიღება. მორწუნეებს 10-15 წუთის განმავლობაში, საგანგებო მდგომარეობის პირობების გათვალისწინებით, შეუძლიათ შიგ შესვლა და ლოცვა.





ფოტოები - ადიგენის, სოფელ არლის წმ. იოსების სახელობის ეკლესიიდან

[თაკო ფეიქრიშვილი, ადიგენი]