‘წირვა აუცილებლად ჩატარდება და იმედია ხალხიც მოვა’- ახალქალაქის მიტროპოლიტი

„ღმერთმა დაგვიფაროს ისეთი რამ მოხდეს, რომ წირვა არ ჩატარდეს. წირვა აუცილებლად ჩატარდება, რაც შეეხება მრევლის დასწრებას, იმედია, რომ დაესწრება ხალხი, აბა, რისთვის ტარდება?! „კომენდანტის საათის“ შემოღება ზღუდავს თავისუფლად გადაადგილებას, კონტაქტებს, მაგრამ არ არის მოსახლეობის საწინააღმდეგოდ, არის პრევენცია. შესაბამისად, თუ ასეთი აუცილებლობა იქნება, რომ ღამე წირვაზე მოვიდნენ ადამიანები, მე ვერ წამომიდგენია, რომ მთავრობა ან ხალხს დაუპირისპირდეს, ან ეკლესიას. რატომ? - მთავრობა გვიცავს“, - ამბობს მიტროპოლიტი.

მისივე თქმით, „კომენდანტის საათის“ დარღვევის გამო არც სასულიერო პირები უნდა დაჯარიმდნენ: „ეკლესიაში მრევლის მოსვლა კანონს არ არღვევს, კანონს ადგენს ხელისუფლება და ხელისუფლებას მიმართეთ ამ კითხვებით. თუ ჩვენ მოვალთ და წირვას ჩავატარებთ, ე.ი. ჩვენც კანონს ვარღვევთ? ჩვენც უნდა გადავიხადოთ ჯარიმა? საღამოს 9:00 საათზე როგორ მოვალთ და მთელი ღამე ტაძარში როგორ ვიქნებით? რა თქმა უნდა, კონსულტაციებს არ გამოვრიცხავთ. ჩვენ ამ თემაზე ვისაუბრებთ დიდი ხუთშაბათის შემდეგ“.

დაჯარიმდებიან თუ არა ის პირები, რომლებიც კომენდანტი საათის დროს ტაძრებში ღვთისმსახურებაზე დასასწრებად წავლენ, შსს-ში პასუხი არ აქვთ. უწყებაში ამბობენ, რომ მთავრობის გადაწყვეტილებას ელოდებიან.

[sknews.ge]