მართლმადიდებელი ეკლესია კვირაცხოვლობის დღესასწაულს აღნიშნავს

კვირაცხოვლობას ასევე თომას კვირა ეწოდება. წმინდა სახარების მიხედვით, აღდგომის დღეს, მაცხოვარი თავის მოწაფეებს გამოეცხადა და ჭრილობები აჩვენა. თომა მოციქული ამ შეხვედრას არ ესწრებოდა. როდესაც მან ეს ამბავი შეიტყო, თქვა, რომ სანამ საკუთარი თვალით არ ნახავდა მაცხოვარს, მის ადღგომას ვერ დაიჯერებდა.

აღდგომიდან მერვე დღეს, კვირა საღამოს, მაცხოვარი თომა მოციქულის თანდასწრებით კვლავ გამოეცხადა მოწაფეებს. მან მოციქულს ჭრილობები აჩვენა და უთხრა ხელით შეხებოდა, რათა მის აღდგომაში დარწმუნებულიყო.

თომა მოციქული მუხლებზე დაეცა, მაცხოვარს თაყვანი სცა და თქვა: "უფალი ჩემი და ღმერთი ჩემი". იგი პირველი იყო მოწაფეთა შორის, რომელმაც იესო ქრისტეს ღვთაებრივი ბუნება სრულად აღიარა. უფალმა კი უპასუხა, რომ ნეტარ იქნებიან ისინი, ვისაც არ უხილავს და იწამა.

კვირაცხოვლობას ტაძრებში დაჭრილი არტოსი – საგანგებოდ გამომცხვარი პური რიგდება, რომელიც აღდგომის დღიდან მთელი ბრწყინვალე შვიდეულის მანძილზე ეკლესიებში კანკელის წინ პატარა მაგიდაზე დევს.

ბრწყინვალე შვიდეულის სადღესასწაულო დღეებში არტოსი განსაკუთრებული მადლით იმოსება და დიდ სიწმინდეს წარმოადგენს.
მორწმუნეები მას განსაცდელისას, სულიერი და ხორციელი უძლურების დროს იღებენ.

კორონავირუსის გავცელების გამო საქართველოში საგანგებო მდგომარეობა და ე.წ კომენდანტის საათია გამოცხადებული, იკრძალება სამზე მეტი პირის თავშეყრა, მიუხედავად ამისა მართლმადიდებლურ ტარძრებში წირვა–ლოცვა მაინც აღევლინება. სასულიერო პირები და მრევლი აცხადებს, რომ იცავენ დისტანციას და ინფექციის გავრცელების საშიშროება არ არის. მედიკოსების არაერთი მოწოდების მიუხედავად მორწმუნეები საერთო კოვზით იღებენ ზიარებასაც. საპატრიარქომ ჯერ კიდევ 29 თებერვალს განაცხადა, რომ ზიარებისთვის ერთჯერად კოვზს არ გამოიყენებს.





[sknews.ge]