ბზობის სადღესასწაულო წირვა ახალციხეში [ფოტო/ვიდეო]

დღეს, 12 აპრილს, მართლმადიდებელი ეკლესია ბზობის დღესასწაულს აღნიშნავს. რაბათის წმ. მარინეს სახელობის ტაძარში მსახურება ახალციხისა და ტაო-კლარჯეთის ეპარქიის მიტროპოლიტრმა, თეოდორე ჭუაძემ აღავლინა.



ლიტურგია ეზოში შესრულდა, მასზე დასასწრებად მრევლს შეზღუდვა არ ჰქონია. ბზის ტოტები მათ ეზოში დაურიგდათ.

მსახურების დროს სტიქაროსნები და სასულიერო პირები ათობით მრევლს დისტანციის დაცვისკენ მოუწოდებნენ, მიუხედავად ამისა, გადადგილებისას დისტანცია დაცული არ იყო.

წირვას, მორწმუნეების უმეტესობა, პირბადისა და სხვა დამცავი საშუალებების გარეშე დაესწრო. ცუდი ამინდის გამო, მათი ნაწილი ტაძარში ლოცულობდა.

წირვას დაესწრო ახალციხის მუნიციპალიტეტის მერი, ზაზა მელიქიძე. „სამხრეთის კარიბჭეს“ კითხვაზე, ირღვევა თუ არა მთავრობის დადგენილება, რომლის მიხედვითაც იკრძალება სამზე მეტი პირის თავშეყრა, გარდა აფთიაქების და სასურსათო მაღაზიებისა, მელიქიძემ გვიპასუხა: „არაფერი დარღვევა არ არის, როგორც არის რეგულაციები, ყველაფერი ისე მიმდინარეობს. ადამიანები იცავენ დისტანციებს“.

















[თიკო ზაზაძე, ახალციხე]