ადიგენის ‘ცხელების ცენტრში’ ერთ პაციენტზე ლუგარის ლაბორატორიიდან პასუხს ელოდებიან

„ანამნეზმა არაფერი აჩვენა, თუმცა მაინც ჩავთვალეთ საჭიროდ, რომ გადაგვეგზავნა ლაბორატორიაში, პასუხები, ალბათ დღეს საღამოს იქნება“ – გვითხრა კლინიკის ხელმძღვანელმა.

სამცხე–ჯავახეთში სულ ოთხი „ცხელების ცენტრია“, 13 აპრილის დილის მონაცემებით, პაციენტები მხოლოდ ადიგენსა და ახალქალაქში ჰყავთ.

ახალქალაქის რეფერალური ჰოსპიტალის ხელმძღვანელის, ალექსანდრე თოროიანის განმარტებით, მათ ცენტრში ერთი პაციენტია და მისი მდგომარეობა დამაკმაყოფილებელია. ლუგარის ლაბორატორიაში ანალიზების გადაგზავნას ამ ეტაპზე არ საჭიროებს, რადგან მას ვირუსის ნიშნები არ აქვს.

„ცხელების ცენტრები“ ახალი კორონავირუსის გავრცელების გამო, მთელი საქართველოს მასშტაბით გაიხსნა, სადაც Covid-19–ის სიმპტომიან პაციენტებს ბოქსირებულ პალატებში აკვირდებიან.

ამ დროისთვის საქართველოში ახალი კორონავირუსის 266 დადასტურებული შემთხვევაა, აქედან 67 გამოჯანმრთელდა, სამი კი გარდაიცვალა.

[რობი ზარიძე, ახალციხე]