როგორია მიმართვიანობა სამცხე–ჯავახეთის ცხელების ცენტრებში

ახალციხის რეფერალური ჰოსპიტალის მენეჯერის, რევაზ კუჭუხიძის ინფორმაციით ამ დროისთვის ახალციხის ცხელების კლინიკაში 3 ადამიანი წევს. მისივე თქმით მათ მხოლოდ ტემპერატურა აღენიშნებათ და ამჟამად მხოლოდ დაკვირვების ქვეშ იმყოფებიან.

ორი პაციენტი იმყოფება ამ დროისთვის ახალქალაქის ცხელების ცენტრში. როგორც კლინიკის მენეჯერი, ალექსანდრე თოროიანი ამბობს პაციენტებს სიცხე და პნევმონია აღენიშნებათ.

„ამჟამად არიან დაკვირვების ქვეშ. ანამნეზი აქვთ სუფთა. არანაირი კონტაქტი არ დგინდება არც ინფიცირებულებთან და არც მოგზაურობის ისტორია აქვთ. ამ ეტაპზე არ საჭიროებს ანალიზების გადაგზავნას.“ – გვითხრა ალექსანდრე თოროიანმა.

ბორჯომსა და ადიგენში ცხელების ცენტრებისთვის ამ დრომდე არავის მიუმართავს.

ბორჯომის კლინიკის ხელმძღვანელის, ირაკლი დიასამიძის განმარტებით, ცხელების კლინიკა ოფიციალურად ხვალ გაიხსნება, თუმცა მისი თქმით ამ დროის განმავლობაში მიმართვიანობა არ ყოფილა. ადიგენის ცხელების ცენტრში კი გვითხრეს რომ ამ დროისთვის სამივე ბოქსირებული პალატა ცარიელია.

პაციენტებისთვის, რომლებსაც Covid-19 სიმპტომები აღენიშნებათ რეგიონებში ცხელების კლინიკები გასულ კვირას მოეწყო. მათ შორის სამცხე–ჯავახეთის ოთხ მუნიციპალიტეტში.

ამ დროისთვის ქვეყანაში ახალი კორონავირუსით 188 ადამიანია ინფიცირებული, მათგან 36 გამოჯანმრთელდა, ორი კი გარდაიცვალა.

[რობი ზარიძე, ახალციხე]