COVID-19: ახალციხის ‘ცხელების ცენტრში’ 4 პაციენტის ანალიზის პასუხს ელოდებიან

„მივიღეთ შვიდი ანალიზის პაუხი, ყველა მათგანი უარყოფითია, კიდევ ველოდებით ოთხს, რომელიც არ მოსულა. დღის განმავლობაში კიდევ ავიღებთ ნიმუშებს, რომელიც გადაიგზავნება, ამ ეტაპზე ზუსტად არ ვიცით რამდენს გადავაგზავნით“, – ამბობს კლინიკის დირექტორი, გიორგი ბარძიმაძე.

მისი თქმით, კლინიკაში ამ დროისთვის 14 პაციენტი იმყოფება.

კლინიკა „იმედი“ „ცხელების ცენტრად“ აპრილში გადაკეთდა. დღეის მონაცემებით კლინკამ 140 ცხელებიანი პაციენტი მიიღო, აქედან ოთხს covid-19 დაუდასტურდა.

ოთხივე მათგანი სამედიცინო დაწესებულებაში საკარანტინო ზონებიდან შეიყვანეს, მათ შეხება ადგილობრივებთან არ ჰქონიათ.

11 მაისის მონაცემებით, პაციენტები არ ჰყავთ ბორჯომის და აბასთუმნის „ცხელების ცენტრებს“.

სამცხე–ჯავახეთში კორონავირუსის პირველი შემთხვევა 16 აპრილს დაფიქსირდა.

ქვეყნის მასშტაბით კორონავირუსით ინფიცირების 638 შემთხვევაა გამოვლენილი, აქედან 10 პაციენტი გარდაიცვალა, 317 გამოჯანმრთელდა.

[ნუკა სტეფნაძე, ახალციხე]