საგანგებო მდგომარეობის გახანგრძლივების ვადა ორი ფაქტორის გათვალისწინებით მოხდება – წულუკიანი

„ვინაიდან საგანგებო მდგომარეობა არის ვადიანი, როდესაც ის გამოცხადდა დაწესდა ვადა, ამ ვადის ამოწურვის მოახლოებასთან დაკავშირებით რა თქმა უნდა მსჯელობა იქნება კიდევ ერთხელ უფრო აქტიური. დღეს ეს მსჯელობა საწყის ეტაპზეა, მაგრამ აქტიური ჯერ არ არის, რადგან ვადა ჯერ კიდევ გვაქვს. როგორც კი დრო მოახლოვდება რა თქმა უნდა იქნება უფრო აქტიური და გადაწყვეტილებაც იქნება მიღებული, ორი ფაქტორის გათვალისწინებით: ეს არის ეპიდემიოლოგიური მდგომარეობა, სადაც ჩვენ პროფესიონალების აზრს გავითვალისწინებთ და სხვადასხვა უწყებების მხრიდან წარმოდგენილი მოსაზრებები, იმის და მიხედვით, თუ რა არის ქვეყნისთვის საჭირო, რომ ისევ ეფექტურად გაგრძელდეს ვირუსთან ბრძოლა, როგორც ეს აქმდე ხდებოდა“, – განაცხადა თეა წულუკიანმა დღევანდელ ბრიფინგზე.

წულუკიანის განმარტებით, საგანგებო მდგომარეობის გახანგრძლივების საკითხზე მსჯელობისას, გაითვალისწინებენ საზოგადოების დამოკიდებულებას შემოღებულ აკრძალვებთან დაკავშირებითაც.

„რა თქმა უნდა მხედველობაში ასევე მივიღებთ იმ კონკრეტულ დღეს საზოგადოების ქცევის მდგომარეობასაც. თუკი წესებს იცავს მხოლოდ საზოგადოების ერთი ნაწილი და დანარჩენი არ იცავს, გადაწყვეტილება შეიძლება იყოს სხვაგვარი, მაგარმ ეს დღეს არის მხოლოდ ვარაუდები, სპეკულაციები, მთავარი რაც შეგვიძლია დღეს ვთქვათ არის ის, რომ რა თქმა უნდა აქტიური და ყოვლისმომცველი მსჯელობა შედგება როგორც კი ამოწურვასთან გვექნება საქმე და ეს დღე ჯერ არ დამდგარა“, – აღნიშნა წულუკიანმა.

საქართველოში ერთთვიანი საგანგებო მდგომაროება 21 მარტს გამოცხადდა.

31 მარტიდან საქართველოში საყოველთაო კარანტინი და „კომენდანტის საათია“ გამოცხადებული. მოქალაქეს, რომელიც დაარღვევს საგანგებო მდგომარეობის რეჟიმს 3 000 ლარიანი ჯარიმა დაეკისრება, ხოლო იურიდიულ პირს 15 000 ლარი.

ამავე თემაზე:

რას ღონისძიებები გატარდება საგანგებო მდგომარეობის დროს – პრემიერ–მინისტრის განმარტებები

COVID 19 - სიმპტომები და გავრცელება - რა უნდა ვიცოდეთ ახალ კორონავირუსზე

[sknews.ge]