'თუ ქვეითად მოსიარულეებმა წალეკეს ქუჩები, მივიღებთ სხვა ზომებს' – წულუკიანი

„მთავრობა ალბათ ძალიან მალე დაუბრუნდება მსჯელობას საყოველთაო კარანტინთან დაკავშირებით, მაგრამ გადაწყვეტილება იმის მიხედვით მიიღება, თუ რა სურათს მივიღებთ ხვალ, დილის 12:15 საათიდან. თუ შევხედავთ, რომ მანქანები აღარ მოძრაობენ, რადგან ეს აიკრძალა, მაგრამ სამაგიეროდ, ქუჩაში მივიღეთ ფეხით მოსიარულე ზღვა ხალხი, რა თქმა უნდა, ამის აკრძალვაც მოგვიწევს. მთავრობა გააკეთებს ყველაფერ იმას, რაც მოცემულ მომენტში იქნება საჭირო, საჭიროება კი მოქალაქეების ქცევით არის განპირობებული. მესმის, რომ კარგი ამინდებია და ყველას გვიხარია დაგვიანებული გაზაფხულის მოსვლა, მაგრამ ჩვენ სიკვდილის საფრთხის წინაშე ვართ, ყველა ერთნაირად და ამიტომ, თუ მოქალაქე თავად არ შეიძენს ქცევას, რომელიც მისთვის უსაფრთხოა, მთავრობის ვალდებულებაა, მოქალაქეს ამგვარი ქცევა სხვადასხვანაირი მეთოდებით შეაძენინოს. ჩვენ თუ ხვალ დავინახეთ,რომ მიუხედავად აკრძალვისა, სიგნალი მაინც ვერ იქნება ზუსტად გაგებული და ახლა უკვე ქვეითად მოსიარულეებმა წალეკეს ქუჩები, რა თქმა უნდა მისაღები იქნება სხვა ტიპის და კიდევ უფრო მკაცრი გადაწყვეტილება. ამიტომ ნუ მივიყვანთ ქვეყანას აქამდე“, – განაცხადა პირველ არხთან თეა წულუკიანმა.

მისივე თქმით დღევანდელი გადაწყვეტილება გამოწვეულია იმით, რომ საზოგადოება მოწოდებებს შესაბამისად არ პასუხობს.

„დღეს, გუშინ და გუშინწინ ქუჩაში იყო ბევრი მანქანა, მოძრაობს ბევრი ადამიანი. დღეს, დილით, თათბირზე რეგიონებიდანაც მივიღეთ ფოტო-ვიდეომასალები, სხვა ინფორმაცია და ჩავთვალეთ, რომ უკვე დადგა დრო, გვემსჯელა, თუ რა უნდა გავაკეთოთ, რათა მოქალაქეს გავაკეთებინოთ ის, რასაც მოწოდებების მიუხედავად თავად არ აკეთებს“.

მთავრობის გადაწყვეტილებით 17 აპრილიდან სრულად იკრძალება მსუბუქი ავტომობილების გადაადგილება. შეზღუდვა 12:00 საათიდან ამოქმედდება.

ქვეყანაში 21 მარტიდან მოქმედებს საგანგებო მდგომარეობა, 31 მარტიდან კი კარანტინის რეჟიმი კარანტინის რეჟიმი და კომენდანტის საათი.
მოქალაქეს, რომელიც დაარღვევს საგანგებო მდგომარეობის რეჟიმს დაარღვევს 3 000 ლარიანი ჯარიმა დაეკისრება, ხოლო იურიდიულ პირს 15 000 ლარი.

[რობი ზარიძე]